LinkBack URL
About LinkBacks
و غايه من التعب يلست اتفكر شوي بأحمد و نامت و هي مب حاسه بعمرها بعكس العنود الي من ردت من بيت عمها و هي يالسه في حجرتها و قلبها يدق بالقو مب عارفه شو تسوي و خايفه اول مره اتحس بهالاحساس صوب مطر هي كانت تحبه بس فهاليوم حست باحساس ثاني حست بحب ثاني لمطر تمت تفكر و تتخيل مطر و حياتها كيف ممكن اتكون معاه فهاللحظه بس حست انها كبرت و انها مب العنود الياهل لا اللحين صارت عنود ثانيه عسى ربي ما يحرمني من بو غيث عسى
عالساعه 4:30 الفير راح يد غايه صوب غايه يقرقع عليها عشان تنش و تصلي الصبح
و من عقب ما صلت ظهرت صوب المطبخ و سودت ليدها دلة القهوه و الحليب و امرت ع حيدر انه يشلهن صوب يدها و من شافها يدها
راحت غايه صوبه و وايهته و من عقب حبته ع راسه
يد غايه : يعني هب بلاج
غايه : و شاصبحت اليوم
يد غايه : بخير فديتج هاه العيوز بتخاويني العزبه
و غايه بتموت ما تريد تسرح العزبه الا مستحيه من يدها
غايه : انت بتسرح ؟
يد غايه : هيه نعم
و فهاللحظه ان بو غايه ظاهر صوبهم جان تنش غايه و توايه و تحبه ع رقبته
بو غايه و هو يلوي عليها : فديتج اسميني ما بتعوض فيج لو ترست البيت عيال
غايه : هيه الا رمسه و الا تبى اتفرينه لشيبه
بوغايه : لا حووووول
غايه : باباتي و الله ماريد اعرس
بوغايه : و من قالج اني بخليج اتفارقيني انا ما طيق البيت دونج
غايه و هي تلوي عبوها : فدييييييييت روووووحك
و فالتالي سرح بو غايه و يدها صوب العزبه و هي ردت حجرتها و نامت
في بوظبي
حامد ما كان بايت فالبيت و الصبح كان توه ظاوي و منصور كان توه ناش بيروح صوب الشركه كان يالس عالطاوله و هو لابس نظاره طبيه فريمها اسود و لابس كندوره بيج للون البني الفااااتح و سفره من نفس اللون و يشرب حليب
و ان حامد توه راد البيت و هو لابس شورت و قميس و كب . استغرب منصور من شافه
من شاف حامد منصور ارتبك شوي بس بعدين عادي
منصور و هو مستغرب : صباح الخير
حامد و هو يمشي بيروح صوب الدري بيروح الطابق الثاني صوب حجرته : صباح النور
منصور : شو كنت تمشي الصبح ؟
حامد : امشي ؟!!! لا
منصور و هو يوقف : شو فيك ؟
حامد و هو يفتر عنه : ماشي
منصور : اكلمك لا تجفيبي
حامد : منصور تعبان و اريد انام
و راح حامد عن منصور و خلاه بروحه فالصاله يالله هالانسان شو مشكلته
ظهر منصور و راح شركته و هو طول الطريج يفكر بحامد شو فيه ؟ شعنده لا اكيييييد فيه شي راح منصور صوب شركته و ارتبش بالشغل الي عنده و ما حس بالوقت اللين ما اتصلبه سعيد
منصور : و الله من 8 الصبح و انا فالشركه
سعيد : ارحم عمرك الساعه 3 الظهر اللحين
منصور : يله شوي و برد البيت انت وين ؟.
سعيد : انا فسويحان
منصور : و الله
سعيد : هيه و الله امس ظهرت من الدوام صوب سويحان
منصور و قلبه يدق بالقو : يا حيك
سعيد : ما بتينا ؟
منصور : وين اييكم ؟
سعيد : سويحان
خلى منصور الملف من اييده : اذا بتسويلي جامي بييكم
سعيد : هههههههههههههههههههههههههههه امره فالك طيب
منصور : فالك ما يخيب ان شاء الله من عقب المغرب بييك
سعيد : خلاص برقبك
منصور : ان شاء الله
و ظهر منصور من الشركه و رد البيت و دخل سيده قسمه راح و نام ساعتين و نش عالساعه 5 تسبح و تلبس لبس كندوره نيليه و سفره بيضى و عقال و لبس نظارته و ظهر من البيت دون ما يشوف خاواته و الا حامد راح صوب سويحان و اذن عليه المغرب فالدرب من وصل سويحان راح صوب المسيد و صلى المغرب و من عقب اتصل بسعيد و راح بيت قوم سعيد و كانو فالميالس و من درت العنود ربعت صوب غايه اتخبرها و كانن يالسات فالحجره
العنود : ظنج شعنه يانا ؟
غايه : فقدته بن عروه استهم منه
العنود : ظنج شو بيقولوله .؟
غايه : جني سلمت من حمد بقتك من هالشيبه
العنود : غايوه تبين الصراحه و الله ان منصور شيخ
غايه : شاخت ركبج و ركبه عسى شيخ ع عمره مب عليه
العنود : يالله يا عوافتج حشى
غايه : يااااالله لو تعرفين امس منو شفت
العنود : منو شفتي .؟
غايه : ريت احمد
العنود : حلفي ؟
غايه : و الله لا و سمعته و هو يغني بعد يااااااااااالله فدييييييييييييييييييت صوته
العنود : عاااشووو
غايه : اوووه صح تعرفين ان شوقج ما بات فالبيت امس
العنود : و الله
غايه : عنود رمسي شو استوى من بينكم
العنود : حرام عليج و الله ما استوى شي
فهاللحظه سمعن عبيد و هو يزقر
نشن يترابعن صوبه
عبيد : انا اخبركم انا بالسبت بسرح دبي و بخلص اوراقنا فالطب الوقائي و من اخلص الاوراق بملج
حمد : استريح انت تخلص اوراقك من العين
عبيد : ما عليك انا بخلصهن من دبي
ام غايه : يالله يالحكم خلص اوراقك و خلها تخلص اوراقها
عبيد : ما عليكم انا و حرمتيه نتفاهم
و ان غايه و العنود ظاهرات صوبهم رفع حمد عينه صوب العنود بنظره و من عقب نزلها و لا جن العنود دخلت عليهم العنود و غايه حسن بنظرته و العنود بغت تموت حمد نقووودي و ينقد الهوى الطاير يالله جن ربي يعاقبني
فهاللحظه و قبل لا ييلسون حد مطر عليهم الصاله و سلم عليهم عادي و العنود مستغربه انه ما كلمها و لا افتر صوبها شو فيه ؟ من دخل مطر نش حمد عنهم و هو توه عند الباب رن تيلفونه جان يشله و يظهر من البيت صوب سيارته و من عقب ما ركب سيارته شاف سيارة منصور واقفه عند ميالس قوم عمه تم يرمس شوي فالتيلفون و من عقب حرك سيارته صوب ميالس قوم عمه و وقف عدال سيارة منصور و راحلهم الميالس و مطر ما يلس عندهم دخل حجرته يتسبح و العنود ميته من نظرت حمد و اللحين زادها مطر بلا مبالاته
من دخل حمد الميلس و منصور مرتبك و خايف حاس ان اليوم بيعرف ردهم عليه تمو يسولفون و حمد متلوم منه و الله منصور يستاهل كل خير و العنود ظاربتنها غصه و من ظيجتها دخلت حجرة غايه و تمت تصيح مب عارفه مطر شعنده عليها و مطر من ظهر ما لقى العنود كان يريد يكلمها الا من شاف حمد يالس ما حب انه يحرجها خص من بعد ما شافهم امس مع بعض ظهر مطر و توه بيروح و جان يشوف سيايير الشباب عند قوم عمه جان يروح صوبهم و لقى منصور و سعيد و حمد يالسين و من عقب ما سلم عليهم يلسو و يسولفون و منصور من ياهم مطر ارتبك اكثر و شو و ان العشى يأذن جان ينشون بيروحون صوب المسيد و ان يد غايه و بو غايه ظاهرين من البيت بيروحون المسيد و تلاقو مع الشباب و تخاوو صوب المسيد و منصور مرتبش من الخاطر و هو يمشي من بينهم و من عقب ما صلو و هم ظاهرين من المسيد كان منصور يلبس نعاله و توه بينزل من دري المسيد جان يمسكه بو غايه من ايده و اخره اللين ما تخطوهم الرياييل
بو غايه : شحالك ولديه ؟ وش حال خاواتك ؟
منصور : بخير ربي يسلمك
بو غايه : عساهم دوم ان شاء الله
منصور : يميييييع
بو غايه : منصور اريدك تعرف انت غالي و الله يشهد انك من غلات حمد و خوانه
منصور : و الله يا عمي انتو مب رخاص عندي
بو غايه : ادريبك فديت روحك و الا ما ييتنا و متعني
سكت منصور
بو غايه : يا ولديه انت ريال و لا يعيبك شي
فهاللحظه حس منصور انه عرف الاجابه لا .
ارتبك منصور و ما عرف شو يقول تم يمشي و هو مب حاس بعمره لا لا تكمل ما يريد يسمع باقي رمست بو غايه فهاللحظه افتر حمد صوب منصور و انتبهله جان يأخر اللين ما تمو عنده و يمشون
بو غايه : البنت يوم شاورناها من قبل لا نقولها من المعرس قالت انها ما تبى تعرس
حمد : منصور هي مب رافضتنك انت بعينك لا هي رافضه العرس
بو غايه : البنت تبى تكمل دراستها
منصور و هو يفتر صوب بو غايه : و انا يا عمي ما بمنعها لا من دراسه و لا من شي هي تباه الي تباه بيستوي من قبل لا تطلبه
حمد : و الله انك ريال و لا تنعاب
افتر منصور صوب حمد بس ما تكلم
بو غايه : انا ما عندي الا هالبنت و ما روم اغصبها ع شي هي ما تباه
منصور : عمي جنها ما بغتني بطيبها انا مالي حايه فيها عمي انا ماريد وحده اخذها يومين و من عقب افرها انا اباها ستر و غطى لي طول العمر
من قال هالرمسه مات حمد غيض ع غايه الله يغربل هالياهل ودها هي جنها بتظوي واحد شراته و بو غايه تلوم منه لانه و الله ريال حشيم و ما يستاهل الا كل خير
بو غايه : منصور جن الله كاتب غايه من نصيبك تراها حليلتك ان طال الزمان و الا قصر
منصور : ربي يقدم الخير ان شاء الله
حمد : منصور و الله يا اني ما بحصل واحد شرواك لختيه و جنك الا بتترياها تراها من اليوم حليلتك
منصور : و انا اشهد اني بترياها بدل السنه عشر
بو غايه : ان شاء الله خير
اول شي كان منصور وااااااااااايد مكتئب بس من عقب هالرمسه ارتاح نفسيا لان هالعرب كلمتهم حد سيف و دام انهم شبه مقربيبه ان شاء الله غايه من نصيبه
من عقب العشى تمو الشباب سهرانين اللين الساعه 2 و من عقب ترخص عنهم منصور و رد بوظبي و هو طول الطريج و هو في عالم ثاني غايه مب رافضتني انا لا هي رافضه العرس بوجه عام يالله تكتبها من نصيبي و اتقدملي بخير
باليمعه العنود ما راحت بيت عمها حاز في خاطرها موقف مطر منها و مطر مب عارف شو يسوي يريد انه يرمس العنود و في نفس الوقت ما يريد حد يعرب بهالرمسه الي بيقولها فما ينفع انه يقولها لغايه عشان اتقولها لها و احمد ع كل دقيقه يشوف تيلفونه اذا وصله تقرير ان غايه استلمت المسج و الا لا . يالله باقي ساعتين و بروح الكليه يالله يا رب تفتح تيلفونها بس للاسف غايه ما فتحت تيلفونها و راحو الشباب صوب الكليه و البنات مرتبشات بدوامهن باجر فالجامعه
بالسبت الصبح
سرحن البنات صوب الجامعه فالباص ( في باص مخصص لبنات سويحان يسرحن كل يوم و يرجعهن ) و راحن الجامعه و عبيد من فالير سرح دبي و هو فالطريج اتصل بشامس يشوفه متى بيروحون الطب الوقائي عشان تخلص سلامه فوحوصاتها
و قاله انهم من عقب الساعه 10 بيروحون عشان يخلصون الفوحوصات خطف عبيد الاتصالات و خذله رقم يديد على اسم واحد من ربعه يشتغل فالاتصالات و من عقب راح صوب الطب الوقائي و لقى وحده اتسجل الاسامي و المكان متروس شباب و بنات ماشاء الله كلهم بيعرسون راح عبيد عند الحرمه عشان يسجل اسمه
الحرمه : لو سمحت صور ويه لازم
عبيد : و الله ؟ ما قالولي
الحرمه : لا لازم صور
عبيد : ما عليه اللحين بروح اتصور و برد
الحرمه : بس عطني اسمك عشان اسجله
عطاها اسمه بالكامل و تم يقرى اللسته مالت الاسامي جان يقرى اسم سلامه .
جان يأشر بصبعه ع اسمها
عبيد : اقولج هالبنت فحصت ؟
الحرمه : لا
عبيد : شعنه ؟
الحرمه : مب مكمله اوراقها مب يايبه صور معاها
عبيد : حافظ عليها ثرها الا ربيعتيه انزين يعني اللحين ما بتفحص اليوم
الحرمه : لا بتفحص بس راحت تتصور و بترجع
عبيد : بذمتج . ما قالتلج عند أي استيديو راحت تتصور
الحرمه : لا و الله
عبيد : يا خساره ما عليه جنها يت و انا بعدني ما ييت قوليلها زوج المستقبل يسلم عليييييييج وااااااااااااايد
الحرمه : هههههههههههههههههههه ان شاء الله
و راح عبيد عنهم عشان يتصور و من عقب ما راح بربع ساعه رجعت سلامه و امها مره ثانيه و كانت يايبه الصور فياها
و عطتهن للحرمه
الحرمه و هي تأشر على اسم عبيد : تعرفين راعي هالاسم ؟
سلامه من عقب ما قرت اسم عبيد و هي مستحيه : هيه
الحرمه : من ربع ساعه كان هني بعد هو مثلج مب يايب معاه الصور راح يتصور و بيرجع
سلامه : اها
الحرمه و هي ادبس الصور : شكله يحبج ( صخت سلامه ) سألني عنج و قالي اقولج ان زوج المستقبل يسلم عليج وايد
سلامه ببرود : الله يسلمج
و من عقب ما خلصت راحت و يلست في قسم الحريم ع طرف و بعدها بحول ساعه الا ربع و ان عبيد راد صوبهم من عقب ما تصور
و كان توه حادر و ان شامس و ام سلامه و سلامه توهم بيظهرون و من شاف شامس راح صوبه و سلم عليه و من عقب سلم على ام سلامه و حبها ع راسها و من افتر ع سلامه تيبس الريال محلات عووودها واقفه بهيبتها و جتوفها عريضه
عبيد : شحالج
سلامه : الحمدلله
عاد من سمع صوتها ذاااااااب زووود عن قبل
سلامه و هي تمشي بتتخطاهم : السموحه منكم انا بروح السياره و مشت ببعيد عنه و هوبياكلها بعيونه مشيتها جسمها هيبتها غير غير هالانسانه
و راحو عنه
و غايه فالجامعه و كانت الساعه 12:50 الظهر و توها تفتح تيلفونها عشان تتصل بدريول عشان اييهن عالساعه 2 فالجامعه و كانت في حمامات الزدات و عندها العنود و غرّوب و شما و اول ما فتحت التيلفون و الا ان مسج ياييتنها
مممممممممممممممممممممم.
ظنكم احمد شو طرش لغايه فهالمسج ؟
و مطر شو هالرمسه الي ما يبى حد يعرفها الا العنود ؟
و منصور من عقب ما انقالتله هالرمسه من هل غايه شو بيسوي ؟
ظنكم ممكن اني يحاول يتقرب من غايه و يكسب حبها .
و غايه شو ممكن يستويلها و تغير نظرتها لواحد من ابطالنا سواء ٍ حب و الا كره
و عبيد من قبل و هو يتحرقص يريد يعرس و اللحين عاد من عقب ما شاف سلامه شو بيسوي ؟
و ظنكم سلامه بتحن عليه ؟
و هذا حااامد شو مشكلته ؟ و روحاته و يياته الي محد يدري عنها شي شو وراها ؟
__________________
