رواية خوف من الحب

[إلميآسـه]

الى الحين هالجوال يدق . والبنت مو راضيه تتركه . ماعندها كرامه من جد . خلاص هو ما يبيها . هذي اخر مره بيكلمها وبيفهمها انه ما يبيها تدق عليه مره ثانيه .
سلمان: خيييييييير
لمى: ليه بس ليه ياسلمان
سلمان: خلاص انا قلت لك ما يحتاج تتصلين مره ثانيه
لمى: خلاص ولا يهمك انا مستعده اطلع معك لو الحين تمرنى ماعندي مانع والمكان الي تبي نروحه
سلمان: لا خلاص ما يحتاج تطلعين معى ولا شي
لمى بحزن وصوت مكسور: ليه انت لقيت لك بنت ثانيه.
سلمان: ايه لقيت والحين ممكن تفكينى
لمى وخلاص صوتها كله صياح: لييييييييييه يا سلمان لييييييييييه
سلمان: انتى الحين ايش تبين.
لمى: ابي نرجع مثل اول .
سلمان: اوووووووووف
لمى: شوف انت جرب وماراح تخسر شي حتى انا الي بدق عليك مو لازم انت تدق
سلمان: ليه شايفتنى منتف وماعندي فلوس
لمى : مو قصدي حبيبي بس عشا ن ما اتعبك.
سلمان: ما يحتاج . خلاص يا لمى انا برجع اكلمك .
لمى: والله . ياعمري انت
سلمان: بس بشرط
لمى: تدلل عيونى لك
سلمان: تكونين عند كلمتك . ومره ثانيه اذا عطيتينى كلمه تصيرين قدها
لمى: اكيييييييد .
سلمان: اوكي والحين انا بمضطر اسكر .
لمى: لا تو الناس انا ما صدقت اننا رجعنا لبعض
سلمان: واحد من الربع جاي صوبي وماابيه يشوفنى اكلمك
لمى: اوكي طيب.
وتوه بسكر . الا يسمها تكلمه
لمى: سلمان
سلمان: نعم
لمى: انت من جد تحب بنت ثانيه
سلمان: لا ما احب . ويالله بسرعه بسكر
لمى: اوكي باي احبك
وسكر قبل ما يرد عليها . بس عادي مصيري احصل عليه واخليه يحبنى . ومثل ما راضيته الحين براضيه مره ثانيه .
جلس سلمان يفكر . انا ليه رجعت علاقتى لمى . الحين جات الفرصه لحد عندي وكان بامكانى اتركها . يمكن لانى ابي اطرد صورة رهف من بالي . مابيها تحتل كل تفكيري . الله يعينى على هالبنت واضح انها بتنشب لي نشبه .
بندر: وين رحت
سلمان: هلا بندر.
بندر: اشوفك تكلم تليفون
سلمان: ااااااه ايه اكلم
بندر: ليكون ذيك البنت
سلمان وهو باله بعيد: ايه
بندر: انشالله صفيت الامور معها خلاص
سلمان: لا . تصالحنا
بندر وهو فاتح عيونه: لييييييييه
سلمان: لا تسالنى ليه . يالله خل نروح للجامعه مابقى على وقت المحاضره شي
بندر: الله يهديك بس. يالله مشينا
.

العزيمه الليله بيصير فيها شي والا لا
بتقول سارا لاحد ايش صار بفرنسا ومين هو
مين بكون حاضر للحفله وبيسبب صدمه

_

[إلميآسـه]

الفصل السابع

الجزء الاول

يوم عرف بومحمد ان بنته وصلت وهي في بيته . طلع من الشركه قبل الوقت المحدد . وراح للبيت طبعا بعد ما جاه عبدالعزيز وسلم عليه
وتغدوا كلهم مع بعض . وعلى حدود الساعه 3 العصر دق عبدالعزيز على سارا عشان يمرها وياخذها للبيت .
سارا: بس انا مابعد اشوف اخوانى
عبدالعزيز : بتشوفينهم الليله
سارا: محمد توه داق وقايل انه بيجي مع زوجته وعياله فمو حلوه يجي ولا يشوفنى
عبدالعزيز: كلهم بيجونا الليله . لاحقه عليهم ياالله اهلى يبون يجلسون معنا خصوصا ابوي يبي يتاكد انك بخير.
سارا: اوكي خلاص تعال
عبدالعزيز : ربع ساعه وانا واصل ابي ادق عليك وتطلعين مب نازل
سارا: طيب
وسكرت التليفون.
صالح: بتروحين ؟
سارا: ايه يبه بروح . بيمرنى عبدالعزيز الحين
لطيفه: ماجلستى معنا
سارا: بتجون الليله بيت عمي سالم
صالح: ايه بنجي انشالله
سارا: خلاص اشوفكم هناك . يمه انا بروح غرفتى اشوف اذا فيها شي ابيه واخذه معي
مها: دقيقه بجي معك .
لطيفه: مافيها شي منيره ورهف ما قصروا جاو واخذوا تقريبا كل شي
سارا:ادري بس ابي اتاكد وصراحه ولهت عليها
مها: ههههههههه هين ولهتى والله لو نحاول تنامين فيها وتتركين رجلك ما توافقين
سارا: حرام عليك مو لهالدرجه
مها بمكر: نشوف.
وراحوا لفوق وهم يسولفون . بعد ما دخلت غرفتها حست انها مافارقتها ولا مره . هذي غرفتها من يوم كان عمرها 10 السنين . كانها امس نايمه فيها السرير مرتب والغرفه كلها مرتبه بس شعورها اتجاها كان ناقصه شي تحس بداخلها شي متغير ماتدري ايش. وقفت وخذت تشوف السرير وهي سرحانه بعالم ثاني
مها: سارا
سارا: هلا
مها: ا يش فيك مره وحده سكتى
سارا: مادري والله مها بسالك سؤال غبي
مها: هههههه اكيد
سارا: جد اتكلم
مها: وانا جاده معك
راحت مها وجلست علي سرير سارا
مها: بالاول اجلسى
سارا: لامابي.
وقفت عند التسريحه وقامت تلعب ببقايا مكياجها المحطوط عليها
سارا: مها اول ماتزوجتى عبدالله ايش كان شعورك
ابتسمت مها ابتسامه حلوه: تسالينى يا سارا عن شعوري انتى اكثر وحده كنتى عارفته
سارا: ادري والله ادري انك كنتى تحبينه من وانتى صغيره بس هو مو معبرك وماصدقتى خبر يوم خطبك
مها: قويه ماصدقت خبر
سارا: ههههه نسيتى يوم تدقين على وتقولين لى سارا مو مصدقه . تحرك الثلج
مها: ماللثلج الا انتى
سارا: اشوفك صايره تنكرين كلماتك
مها: هههههه خلاص سارا ايش تبين بالضبط
سارا بتردد: اممم اول مادخلتى غرفتك ببيتنا ايش كان شعورك
مها: هالبيت ماكان غريب على وقبل لا يكون بيتى كان بيت خالتى .
سارا: ايه بس ماحسيتى بشي غريب
مها: مثل ايش
سارا: يعنى انك ندمتى لانك تركتي بيتكم قصدي بيت اهلك
مها: سارا خرعتينى
سارا: وليه اخرعك
مها: في شي بينك وبين عبدالعزيز
سارا: ماقلت كذا بس انا سالتك ليه ما تجاوبين
مها: بجاوب اذا جاوبتينى انتى
سارا: على ايش
مها: انتى ندمانه .
سارا: لا مو ندمانه
مها: طيب وليه هالاسئله
سارا: لانى من جد ابيك تجاوبين عليها .
مها: لا ما ندمت ولا حتى لحظه لانى تزوجت عبدالله .وكل يوم اتاكد من حسن اختيارى تدرين ليش ياسارا
سارا بحيره: لانك سعيده معه
مها: اكيد لانى سعيده بس قبل كل هذا لانى احبه .
سارا: وهو يحبك.
مها: ايه يحبنى . بس هالحب ماجا بسهوله . ياسارا انا اول ما تزوجت عبدالله كنت احبه حب ما يوصف وانتى تدرين انى احبه من وانا صغيره بس الي ما تدرينه ان حبي له الحين ما يقاس بحبي له ايام المراهقه .الحب شي حلو يخلى الي قدامك ملاك بحيث انك ما تشوفين عيوبه . واذا صدر من حبيبك شي ماعجبك او غلط بحقك الحب يخليك تسامحينه غصب عنك هذا الحب الي ماحسيت فيه الا بعد زواجي من عبدالله وهنا عرفت انى كنت فاهمه معنى الحب غلط .
سارا: تعطين للحب معنى رائع
مها: وهو كذا جميل اذا عرفته عدل
سارا: واذا كان الي تحبينه ما يحبك
مها: تحاولين تكسبينه بكل طرق واسلحه الحب الي قدامك تعالى هنا يالدبه
سارا: ايش
مها: ليكون تحسبين ان عبدالعزيز ما يحبك
ارتبكت سارا من كلام مها وخافت انها تكشف لها الي صار وهي ما تبي احد يعرف ماتبي تبين لاحد مدى جرح كرامتها . مستحيل تقول لمها او لغيرها .
سارا: ليه تقولين كذا
مها: انا فاهمتك ياسوير مو لانه ما قال لك كلمه احبك معنى كذا انه ما يحبك حبيبتى الحب اكبر من هالكلمه مو لازم ينطق فيها الشخص عشان تعرفين اذا حبك او لا. بسالك الحين انتى مره قلتى لعبدالعزيز انك تحبينه
سارا: لا
مها: يعنى بيفكر مثلك .
سارا: لاماراح يفكر هو متاكد انى احبه
مها: واشلون يتاكد وانتى ما نطقيتي بها
سارا: الا متاكد
مها: طيب وايش ياكد لك انه ما يحبك .
سارا: انا ما اقول انه ما يحبنى لا مادري والله ماعرف كيف اقول لك بس
مها: حبيبتى ساره احيانا الرجل يعانى مشكله في اخراج مشاعره . وبعضهم يعتبره ضعف المفروض تحاولين اقصى جهدك عشان تطلعين هالمشاعر مو تفكرين انه ما يبادلك اياها
سارا: انتى مو فاهمه
مها: طيب فهمينى
ودق جوال سارا .
سارا: يووه عزيز جا يالله مع السلامه اشوفكم الليله بالبيت .
قامت مها من السرير وراحت الى مكان سارا الي واقفه فيه
مها: بالاول ابيك توعدينى بشي
سارا: اكيد
مها: اوعدينى انك تفكرين بكلامي زين ولا تنسين الحب تضحيه ومسامحه والاهم من ذلك انك تعطين من غير ما تهتمين اذا بتاخذين او لا . لو تحبين عزيز زين اكسبيه .وخليه يحبك مثل ما تحبينه
ابتسمت سارا لمها ابتسامه تحمل كل معانى الشكر . وهزت راسها باشارة نعم .وراحت للباب عشان تطلع ووراها مها
مها: سارا هالبوك لك .
لفت سارا لمها: اشوف
واخذت مها البوك الي فوق التسريحه وعطته لها عقدت سارا بين حواجبها وفتحت البوك
سارا: هذي صوره رهف.وهذي بطاقتها اكيد هذا بوكها ايش جابه هنا.
مها: يمكن نسته يوم تجي قبل يومين مع منيره
سارا: اكيد خلاص خلنى اخذه لها
مها: يالله حبيتى عجلى ولا تتاخرين على رجلك تراه بره يتنتظرك
سارا: انشالله


يــــتـــبــــع

-

[إلميآسـه]

وطلعوا من الغرفه وبعد مالبست سارا عبايتها راحت للسياره عند عبدالعزيز افتحت الباب وطلع لها صوت الشيخ عبدالرحمن السديس يقراء سورة يوسف. الله هذي السوره الوحيده الي مهما قرتها او سمعتها مستحيل تقدر تتركها الا بعد ما تنتهي صح كل القرآن يهديها اذا كانت متضايقه ويزيل همها بس سوره يوسف غير ولان الشيخ يقراء ماحبت تقطع القرآن ودخلت السياره بهدوء وسكرت الباب لف عليها عبدالعزيز وابتسم . ومشت السياره . من كلام مها معها قبل شوي . مع صوت سديس العذب . حست بكل جسمها يسترخى . تسندت على السيت . وغمضت عيونها .حست بكل همومها تروح والضيقه الي كانت تحس فيها من اول ما سمعت كلام عبدالعزيز مع اخوه راحت خلاص بكسبك ياعزيز . وبهدم أي جدار تبنيه بينى وبينك وما انتبهت الا يوم انقطع الصوت . ووقفت السياره .
عبدالعزيز: شكلك تعبتى
سارا : يعنى
عبدالعزيز: ارتاحي لك بالعصر لاتنسين عندنا جماعه الليله
سارا: انشالله .
وانزلوا بعد ما دخلوا البيت كانت ام عمر مع عمر ونورا ومي منسدحه بالارض وهي مندمجه مع ماروكو(مسلسل كرتونى احبه مادري ليه) . اول ما شافت مي عمها وكانت هذي المره الاولى الي تشوفه بعد ما جا قامت بسرعه من قدام التلفزيون وركضت لعمها . عبدالعزيز اخذها وشالها .
مي: اشتقت لك مره ياعمي
عبدالعزيز : وانا اكثر
مي: جبت لى هديه
عبدالعزيز: ايه هههههه خلاص مي خنقتينى .
عمر: خلاص ياماما اتركي عمو . وخلى عمه نورا تسلم عليه .
مي: مابي.
عبدالعزيز: خلها حتى انا مشتاق لها .
عمر: لا مي كبرت مي خلاص
نورا: هههههههه ياحليها تحبك كثير ياعزيز
ونزلت مي من حضن عمها . وارجعت تنسدح على الارض وتشوف التلفزيون
عبدالعزيز: وانا اموت فيها.
نورا: حمدالله على السلامه يا اخوي.
وجات لإخوها وسلمت عليه
عبدالعزيز: الله يسلمك ماكانك يانورا سامنه
عمر: الا بتنفجر
نورا: هههههههه حرام عليكم روح بس انت .خل اسلم على زوجتك ياعمري مستحيه وواقفه وراك وانت مو حاس على دمك
سارا: لا عادي
سارا كانت منحرجه من عمر لازالت تعتبره رجال غريب عنها . وما تملك الجرائه انها تسولف قدامه او تسوي شي.
عبدالعزيز: هذا هي قدامك روحي اشبعي منها.
وراح جلس جنب مي على الارض اخذ منها ريموت التلفزيون
مي: عمي لا تغير القناه
عبدالعزيز: بس دوره كامله وبحط الي تبينه
نورا: شخبارك يامرت اخوي. حمد الله على السلامه
سارا: الله يسلمك يانورا. انتى شخبارك
نورا: بخير.
سارا: الا وينها منيره ورهف.
ام عمر: فوق مثل عوايدهم
سارا: انا رايحه لهم .
نورا: خلك معنا تروح مي تناديهم
سارا: لا انا اصلا رايحه فوق
عبدالعزيز: وابوي وينه
فوزيه: مادري اسال اخوك
وطلعت سارا من الصاله رايحه فوق عند البنات
عبدالعزيز: ماترد ياعمر
عمر: خيير ماكنت معكم ايش تبون
عبدالعزيز: ابوي وينه في لى ماجا
عمر: مادري انا طلعت معك مادري ليه تاخر
فوزيه: خل ادق عليه احسن
نورا: تعال عبدالعزيز قولى ايش رايك بالزواج ههههه
عبدالعزيز: خخخخخ يعنى ايش رايي
مي: عمي لا تحط هالقناه بيخلص ماروكو ابي اشوفه
عبدالعزيز: اوف منك خذي الريموت وفكينى الا الجنيتين مو موجودات
نورا: في بيت جدتهم .
عبدالعزيز: واحمد ماشفته
فوزيه: ليكون ماقلتى له يجي الليله
نورا: الا بيجي هو عمتى عايشه .
وتموا يسولفون بالصاله اما سارا فراحت على طول فوق عند غرفة منيره . الى واضح عليها انها توها طالعه من السبوح وقاعده تمشط شعرها .


يـــتــــبـــع

[إلميآسـه]

وتموا يسولفون بالصاله اما سارا فراحت على طول فوق عند غرفة منيره . الى واضح عليها انها توها طالعه من السبوح وقاعده تمشط شعرها .
سارا: سلالالالالالالالالالالالالالالام
منيره: هلاااا والله .ايش فيك على طول رحتى
سارا: ايش اسوي فيكم كنتوا نايمين ورحت اشوف اهلى
قامت منيره من الكرسي الي قدام التسريحه . وجرت سارا من ايدها وجلسوا على السرير
منيره: المهم تعالى ابيك تقولين لى كل شي بتفصيل.
سارا: ههههههه ايش تبينى اقول لك تدرين بالاول افسخ هالعبايه.
منيره: كل شي. وين رحتى ووين جيتى والاهم عزيز
عقدت سارا بين حواجبها: ايش فيه عزيز
منيره وهي تبتسم بمكر: شلون كان معك . كيف معاملته .
بالاول كانت سارا مقرره تقول لمنيره كل شي وخصوصا الي صار بالاخير بس بعد كلام مها تغير شي بداخل سارا ولاحظت ان ماله دخل تقول لاحد خصوصا المسائل الزوجيه الي خاصه بين الزوجين . لازم تكون من الاسرار
سارا: امممم زين
منيره بخيبه امل: بس زين طيب وين رحتوا بلندن
سارا: رحنا اماكن كثيره اييييييييييه ماقلت لك
منيره: ليه انتى قلتى شي اصلا
سارا: هههههههه اتحداك تتوقعين مين شفت هناك
منيره: مييييين
سارا: مريم
منيره: لا والله ياحليلها شخبارها من زمان عنها
سارا: ايش يا حليلها لو تدرين بس. تصوري سوت لى مشكله مع عزيز
منيره: شلون
وقالت لها سارا كل شي
منيره: ههههههههههههههههههههههههااااي
سارا: ليه تضحكين
منيره: والله انك تحفه مسكين انت يا اخوي ابتليت بوحده على اتفه شي تصيح
عصبت سارا: والله لو انتى مكانى كان ماقدرتى تمسكين نفسك . انتى ماتعرفين اخوك اذا عصب ايش يقول
منيره: هههههههههه والله انى فرحانه كثير ياسارا
سارا باستغراب: ليه
منيره: لانك صرتى الحين قريبه منى اكثر من اول
سارا: ههههههه ياعمري ربي لا يحرمنا من بعض
منيره : اميييييييييين
رهف : ماقدر انا على هالموقف الشاعري
سارا: وجع خرعتينى
منيره: من وين طلعتى لنا انتى
رهف: ما تشوفون نفسكم . طايحين ببعض كانكم عاشقين مو اصدقاء كانى اشوف مشهد من فلم
منيره: انقلعي بس. انتى شلون دخلتى من غير ما نحس
رهف: اولا الباب كان مفتوح . ثانيا صوتك واصل لحد الدرج
سارا: يعنى سمعتى كل شي
رهف: ههههههه لا تخافون ما سمعت الا اخر مشهد
منيره: حلو الحين ممكن تسكرين الباب
رهف: افا تطردونى
سارا: لا ايش دعوه .
منيره: قصدي يا هبله عشان ما يسمعنا احد
رهف: اها قولى من اول . الله شكل عندكم سوالف
سكرت الباب وراحت تربعت على الارض عند السرير بحيث تكون مقابله منيره وسارة
رهف: يالله هاتوا ابي اسمع
سارا وهي تضحك: الله يقطع شر بليسك يارهيف ايش تبين نقول
رهف: امم خلنا نتكلم عن شهر العسل انبسطتى
سارا: الحمد لله
رهف: وليه تقولينها من غير نفس
منيره: ماقالتها من غير نفس رهوف بلا لقافه زايده
رهف: انا الحين ايش قلت .
سارا: ماقالت شي منور. لا جد ساعه اكون اسعد انسانه وساعه احس العكس
منيره: لييييييه
سارا: لانى اذكركم واشتاق لكم
ضربتها منيره بمخده السرير
منيره: يالدبه خرعتينى
سارا: هههههههه . طيب خلاص لا تضربين .
ويدق الباب عليهم بهاللحظه .
منيره: مييييين؟
سالم: ممكن ادخل على الحلوين
رهف: تفضل يبه
ونقزت عشان تفتح الباب
منيره: ياللقفك الحين هذي غرفتى والا غرفتك
رهف وهي تمد لسانها على اختها: غرفتك . بس امون
بعد ما فتحت الباب ودخل سالم الغرفه وهو يبتسم
سالم: سمعت ان العروس هنا
استحت سارا من سالم كثير. هي صح كانت تغطي عنه بس بالاول كان دايم يشوفها خصوصا انها تجي بيتهم كثير . يعنى مده غطاها عنه ما تتعدي الخمس سنوات .
منيره: ليه يبه انت توك تشوفها
سالم: ايه تونى تعالى يا بنيتى خلينى اسلم عليك
رهف: وحنا يبه
سالم : انتوا اربع وعشرين ساعه مقابلكم خل اعطي بنتى الرابعه شي
سارا: مشكور ياعمي
سالم بكل حنيه: بشري يالغاليه انشالله عبدالعزيز مو مضايقك بش
سارا: لا عمي عبدالعزيز مو مقصر معي.
عبدالعزيز: الحمد لله هذا انت سمعتها بنفسك
منيره: بسم الله كل دقيقه يطلع لنا واحد صرنا بسرك مو بيت
رهف: هههههههههههههههههههه
عبدالعزيز بطنز: لا تعرفين تنكتين وانتى يارهف يضحك مره كلام منور
سالم: هههههههه والله ما يعرف يسكت خواتك الا انت اقول سارا بنتى اذا زعلك عبدالعزيز قولى لى تراك بحسبت بناتى .
سارا ابتسمت لعمها: اكيد عمي .
عبدالعزيز: وانت الحين ليه تفاول علينا
سالم: لانى اعرفك زين .وانتوا الحين ايش تسوون فوق ليه ما تنزلون تحت وتجلسون مع امكم
منيره: بنزل بس كنا نسولف مع سارا
عبدالعزيز: خلاص مافي سوالف خلوا سارا ترتاح الحين .
رهف: امس عذرناها اليوم لا
شافها عزيز بنظره سكتتها
سارا: لا مب تعبانه انا الحين
عبدالعزيز : الا تعبانه ولا تنسين عندنا عزيمه الليله مو حلو تتعبين فيها
سالم: ايه يا بنتى كلام رجلك صح ارتاحي الحين وانتوا لا تزعجونها يا بنات
رهف: ترى بنغار
منيره: ايش دعوه
سالم: انا ساتاذن الحين. انزلوا ساعدوا امك . وخلوا مرت اخوكم ترتاح
رهف ومنيره: حاضر يبه
وطلع سالم .
عبدالعزيز: يالله سارا خلنا نريح شوي
سارا: لا جد عزيز انا مو تعبانه وابي اجلس مع البنات
رهف: ياخى اذا هي تبي تجلس لا تجبرها
عبدالعزيز: براحتك .
وطلع من غير ما يعبر سارا لدرجه انها ندمت لانها ماراحت معه شكله زعل يووه ايش يبي ذا مابي ارتاح
منيره: المفروض رحتى
رهف: وليه تروح اذا ماتبي
سارا: ايه صح ليه
منيره: مهما كان لازم تسمعين كلامه
رهف: ايه تكلمي يالفاهمه انتى
منيره: رهيف اعقلي
سارا: خلاص انتوا الثنتين كل هواش بهواش. اييه صح مو هذا بوكك يارهف
وفتحت سارا شنطتها وطلعت بوك رهف منه .
رهف: الله وين لقيتيه .
سارا: بغرفتى
رهف: ببيتكم
سارا: يعنى وين ايش جابه هناك
منيره: يمكن طاح عليك يوم نروح نجيب باقي الاغراض
رهف: الا اكيد طاح هناك. مشكوره حبيتى كنت ادوره . وتونى ناويه الغي بطايق الصراف
سارا: المهم اهتمى فيه مره ثانيه
منيره: سارا من جد روحي لعبدالعزيز لا تجلسين معنا
سارا: اكيد خلاص نام
منيره: ولو روحي له
سارا: منيره ايش فيك . طايحه لى نصايح
رهف: من جد
منيره: ههههههه. شفتوا شلون
سارا: ولا يهمك بروح اصلا ابى ابدل ملابسى واجهز تبون شي قبل لا اطلع
رهف: لا ابد ولا شي روحي ومعك قبلاتنا الحاره وياليت توصلينها لعزيز منا
منيره: هههههههههههههههههههههههههههههههههههههههههههههههههه ههههههه
سارا انحرجت من جد: اقول انقلعوا بس
وطلعت وهي خلاص منحرجه اما رهف ومنيره قاموا يضحكون على مرت اخوهم . راحت سارا لغرفتها ودخلت شافت عبداالعزيز نايم والغرفه مظلمه مره . ماحبت تضايقه وتطلع صوت انسحبت وطلعت نزلت تحت كانت ام عمر لازالت مع نورا بالصاله . ومي مثل ماهي بمكانها . اما عمر ماكان موجود جلست معهم تسولف. ونورا تسالها عن احوالها . بعد فتره نزلوا البنات
رهف : ايش تسوين هنا انتى؟
سارا: جالسه
فوزيه: ايش فيك على البنت على طول ايش تسوين هنا وبصراخ بعد .
رهف: مو رايحه ترتاحين شوي
منيره: ايه صح انا ايش قايله لك ياسوير
سارا: مو تعبانه . قلت اجلس تحت شوي
نورا: زين انكم نزلتوا من صومعتكم فوق
فوزيه: ايه والله طول الوقت بغرفكم
منيره: يمه ماعندنا شي نسويه تحت
فوزيه: المهم زين انكم نزلتوا يالله عشان تساعدونى
رهف: ليه بعد نساعدك وكل هالخدم حق ايش
فوزيه: يمه من لسانك انتى . ادري عندنا خدم بس انتوا خلاص كبرتوا لازم تصيرون حريم
منيره: ابشري يالغاليه الي تبينه نسويه
سارا: يمه لو تبين مساعده انا بعد حاضره
فوزيه: ما تقصرين والله انتى توك عروس والعزيمه بشرفك . منيره ورهف بيساعدونى
رهف: ونورا بعد
فوزيه: يام لسانين اختكم حامل وتعبانه وانتى تبينها تشتغل
نورا: لا يمه والله مو تعبانه
رهف: شفتى
فوزيه: لو ماتبين تساعدنى روحي . ولا تقعدين تقولين هذي سوت وهذي ما سويت
رهف: ايش دعوه يمه اكيد بساعدك قاعده امزح معك
فوزيه: واضح .
.
بعد ما امتلى بيت بو عمر بكل الضيوف من حريم ورجال كانوا الرجال بالمجلس الكبير. اما الحريم فكانوا بمجلس الحريم العزيمه ماكانت كبيره مره . يعنى بس اهل عبدالعزيز الي هم عمته وخاله وخالاته . غير طبعا اهل سارا من عمامها وخوالها المهم بعد ما تجمعو الاهل . والكل انظاره للعروس ويدعى ربه ان الله يوفقها نادى عبدالعزيز سارا للمقلط عشان بيجون خوانها محمد وعبدالله يسلمون عليها .بالمجلس كانت هدى جالسه وجنبها منيره ورهف يسولفون
رهف: ايش قلتى اسمه
هدى : وقف الام .


يــــتــــبــــع


-

[إلميآسـه]

منيره: تعالى ليكون هذا الاعلان الي معلق بمدخل الخبر
هدى: ايه هو .
منيره: تصديق من زمان ابي اعرف ايش سالفته
هدى: مثل ما قلت لكم . تدفعين مبلغ من المال عشان تساهمين بوقف خيري . وبالمقابل نعطيك بطاقه فيها تعريف بقيمه المبلغ تهدينها لامك ويكون الوقف الخيري لها
رهف: الله مرررررررره حلو
هدى: وناجحه . كثير بنات باعماركم ساهموا بالمشروع
منيره: يعنى مثل االهديه
هدى : ايه
رهف: طيب كيف ندفع
هدى: اما ترسلين المبلغ على رقم حساب ماذكره ببنك الراجحي بعدين ترسلين فاكس بقيمه المبلغ وصدوق البريد حقك لمؤسسة الاوقاف الخيريه . وهي بترسل لك البطاقه او تزورين اقرب فرع عندكم
رهف: يووه شغله
هدى: لا موشغله تدرين ايش انا صديقتى داخله بالمشروع لو تبين عطينى المبلغ الي تبين تساهمين فيه وانا اجيب لك البطاقه
رهف: عادي
منيره: تبين تشتركين
رهف: ايه والله اكيد امي بتفرح .
منيره: ماادري
هدى : لا تستحين منى ترى مو لازم
رهف: لا بالعكس حمستينى
هدى: ههههه خلاص متى مابغيتى كلمينى
رهف: اكيد ما تقصرين والله
فوزيه: منيره
منيره: هلا يمه
فوزيه: تعالى ابيك
وقامت منيره راحت لامها .
فوزيه: روحوا شوفوا الخدامات ايش مسوين . ونظموا الامور
منيره: اوكي
فوزيه: تكلمى زي الناس ولا تفشلينى
منيره: حشى يمه الحين ايش قلت انا
فوزيه: لا تطولينها ورحي يالله
بعد ما شافت منور الخدامات راحت تدور سارا الي لازالت بالمقلط مع اخوها عبدالله اما محمد رجع مع عبدالعزيز عند الرجال بالمجلس.فتحت منيره الباب بكل قوتها
منيره: ايه مختبه هنا . هربانه من الشغل .
وقفت مصدومه وعلى طول طلعت . اما عبدالله نزل راسه بس بعد ماشافها . سارا ارتبكت ماعرفت ايش تسوي.
سارا: مسكينه انحرجت بروح اشوفها
عبدالله: وانا برجع المجلس.
سارا: طيب.
عبدالله: هذي بنت عمي سالم؟
سارا: عيب ياعبدالله
عبدالله: عادي . سؤال
سارا: ماراح ارد عليك اعذرنى
عبدالله : افهم من كلامك ايه .
سارا: اقول روح للمجلس احسن .
عبدالله: ههههههههه ايش فيك متخرعه ترى ما امدانى اشوفها
سارا: عبدالللللللله
عبدالله: خلاص سكتنا . يالله انا طالع
واول ما طلع عبدالله الحقت سارا منيره شافتها واقفه عند المطبخ ووجها مره متغير
منيره: يووووووه سارا والله ماكنت ادري ان اخوك معك
سارا: ههههههه ادري
منيره: يارب ما شافنى
سارا: لا لا تخافين ما شافك .
منيره: اشوى الحمد لله .
سارا: المهم ايش كنتى تبين
منيره: لا ابد بس حبيت اجننك . والله فشيله
سارا: منور لا تحاتين ولا تنسين تراه متزوج يعنى حتى لو شافك ايش بيصير مثلا
منيره: بسالك بس لا تظنين انى قليله حيا
سارا: اعرفك زين معقوله بفكر كذا
منيره: هو مين من خوانك محمد والا عبدالله
سارا: هههههههههه وليه ماقلتى سلمان
منيره: لانك ياذكيه قلتى متزوج
سارا: ايه والله لا هذا عبدالله
منيره: اهااا.زوج مها
سارا: ايه
مها: كانى سامعه اسمي
لفت منيره على مها بسرعه وووجها خلاص ابيض مافيه نور لان مها امسكتها بالجرم المشهوداما سارا لاحظت تغير وجهه منيره وحاولت ترقع الموضوع.
سارا: شفتى شلون انتى مهمه
مها: ادري من زمان ايش كنتوا تقولون
سارا: لا بس منيره تقول انك محلوه اليوم
مها: ههههههههه صحيح منور
منيره ارتاحت شوي: ايه محلوه
مها: الحلوه عيونك حتى انتى طالعه حلوه .شكلك بتنخطفين بسرعه
منيره: ايش انخطف؟
سارا: قصدها تنخطبين. ايش عندك جايه هنا مها
مها: ادور فهيد الزفت . مختفى وماودي يعفس في البيت
منيره: اكيد بالحوش مع البزارين .
مها : بروح اشوفه يالله عن اذنكم بنات
سارا: وحنا خل نرجع للضيوف.
بعد ماخلص العشا . حست سارا انها خلاص خيوط شوي تطيح من كثر التعب وندمت من قلب لانها ما سمعت كلام عبدالعزيز ونامت . اول ما طلعوا المعازيم وما بقى الا عمة عبدالعزيز عائشه راحت سارا لغرفتها .
طلع اخر رجال ودخلوا سالم وعياله للصاله شافوا ام عمر وام احمد(عائشه عمتهم) ونورا ورهف ومنيره.
عبدالعزيز: وين هي سارا
رهف: راحت مع اهلها
عبدالعزيز: شلون؟
منيره: ههههههههه
نورا: وانت تصدقهم لا تعبت المسكينه وراحت لغرفتها .
عبدالعزيز: اهاطيب حتى انا برتاح . يالله عن اذنكم
ام احمد: خلك معنا . ماشفناك
عبدالعزيز: ولا يهمك يالعمه . بنجلس
سالم: انا بروح اريح.
ام احمد: يوووه يا اخوي . انت الثاني اجلس
سالم: عشانك
ام احمد: وعمر بتجلس والا تبينى بعد الزم عليك
عمر: افا عمتى . اروح مكان واتركك
فوزيه: ايه انت بالكلام الحلو فالح
نورا: وبكل شي بعد
رهف: اكيد حنا عيال سالم والا ناسيه
سالم: تعالى انتى يالدبه جلسى جنبي
رهف: امي بتغار
فوزيه: لا مابغار روحي لابوك ولصقي فيه بعد
منيره: ايش عليك يمه خلاص جا حبيب قلبك.
عمر: بس حبيب قلبها صارت له حبيبة قلب
عبدالعزيز: انا قلبي مافيه الا وحده فوزيه وبس
نورا: اسكت بس لاتسمعك مرتك وتزعلترى ماتخليك تنام الليل من زعلها
عبدالعزيز: وهذي اول مره ما تخلينى انام فيها
سالم: استح ياولد هذا وانت توك معرس
عبدالعزيز: وهو بكيفي اعرست
استغرب الكل من كلمه عبدالعزيز الا عمر. هم صح عارفين انه مو موافق على الزواج بس بعد مارجع ظنوا الوضع تغير ولمسوا هالشي ايش قاعد يقول الحين
سالم بعصبيه: انت ايش قاعد تقول
عبدالعزيز: يبه ايش فيك عصبت وانا ايش قلت الحين
تكهرب الجو وسكت الكل .
سالم: ماقلت شي. سلامتك .
فوزيه: الله يهداك يابوعمر . على ايش معصب
سالم: ماتشوفين ولدك ايش يقول
ام احمد: ماقال شي يااخوي
سالم: الا قال ايش قصده بهالكلام
عبدالعزيز: الي يسمك يبه يقول انى قايل بطلقها
عمر: عزييييييييييييييز
سالم: قسم بالله منت برجال
عبدالعزيز: يووووووه ماصارت . طيب يبه مانى برجال ارتحت . عن اذنكم
وقام بيطلع من الصاله
سالم: عبدالعزيز
وقف عبدالعزيز: نعم
سالم: لا تقول لسارا شي . والله لو ادري انك قايل لها كلمه من هالكلام راح يكون تصرفي معك غير.
عبدالعزيز: يبه ماظنتى بزر واناعرف كيف اتصرف
ورقي فوق وهو متضايق مره
فوزيه: سالم ماقال عبدالعزيز شي يستاهل هالتعصب كله
سالم: الا قال. يعنى ليه يقول لنا هالكلام وانه مجبور على الزواج وواضح من رده انه مو راضي بالهشي والبنت خلاص صارت زوجته ماله داعي يكرر هالجمله . لو سمعته البنت ايش يش بتقول .
فوزيه: خلاص يابوعمر خلاص البنت ما سمعته . المهم انت هد نفسك شوي موزين لك الانفعال
عمر: ايه يبه امي معها حق كل شي ولا اعصابك
فوزيه: قوم ارتاح شوي الحين.
ام احمد: ايه يا اخوي ارتاح لك شوي
سالم:آآآآآآآآه . الله يكون بالعون
اما نورا ورهف ومنيره كانوا ساكيتن ولا نطقوا بكلمه . منيره تفكر مسكينه انتى يا سارا والله ما تستاهلين الي يصير لك انا عارفتك اكيد هالشي بيحطمك
راح عبدالعزيز فوق لغرفته كان مره متضايق على الي صار تحت انا ليه قلت كذا اكيد هم فهموا من كلامي انى مو راضي الى الحين على هالزواج .شاف سارا نايمه والنور مفتوح . واضح انها كانت تعبانه مره . كانت منبطحه وكانها ربيان وهي لافه على عمرها . ونايمه فوق البطانيه . شعرها طايح على وجهها ومغطيه . واضح انها ماصدقت تبدل ملابسها ونامت على طول جو الغرفه بارد ومن طريقه بطحتها شكلها بردانه . راح لعندها بالسرير. سحب البطانيه من تحتها وغطاها تحركت وهي تهمهم بعدين ابتسمت .وفتحت عيونها.
سارا بصوت كله نوم: انت جيت
عبدالعزيز: اشش ايه جيت ارجعي نامي.
غمضت عيونها وهي لازالت مبتسمه . واارفعت البطانيه بحيث غطت كل جسمها الا راسها .ماقدر عبدالعزيز يرفع عيونه عنها . تم واقف عندها ويشوفها يتامل ابتسامتها الى ماراحت . الله يا سارا لو كنتى تحت او سمعتى الكلام الي قلته ما ابتسمتى هالابتسامه الي تذوبنى . ليه قلت هالكلام ليه وضحت لهم انى مو مبسوط الحين انا مو مبسوط والا ايش.ايش هالشعور الي احس فيه مو قادر افارقه شعور يتملكنى وماعرف شلون اتصرف معه مقعوله انا احب سارا معقوله الشعور الي احس فيه هو الحب لالالا مستحيل مستحيل اقع فيه . لازم ما اخليه يسيطر على . لازم اهزم هالشعور.
ماقطع تفكيره وتاملاته الا يوم انقلبت سارا للجهه الثانيه انتبه على عمره وراح يبدل عشان هو بعد يرتاح

.


يـــتـــبــــع



-

[إلميآسـه]

الساعه الحين 2 بالليل وهي ماجايها النوم حاولت بكل الطرق. بعدين ياست وراحت اخذت فرشتها عشان تسلى نفسها بالرسم . المشكله انها مو قادره ترسم الالهام رايح عنها . يوووه لا جاينى النوم ولا قادره ارسم ايش اسوي . طلعت من غرفتها وراحت للصاله الي فوق جلست تقلب بالقنوات يمكن تشوف لها شي يسليها الحين
رهف: مانمتى منور
منيره: ايه ماجانى النوم وانتى بعد ليه ما نمتى
رهف: جلست على النت ولا حسيت بعمري ويوم سمعت صوت التلفزيون قلت اطلع اشوف مين سهران
منيره: يووه الصوت عالى
رهف: لا
وجلست رهف جنب اختها وقاموا يشوفون التلفزيون .
رهف: منور اذا كنتى ما تبين هالفيلم غيري القناه
منيره: مين قال لك ما ابيه
رهف: مو مركزه معه وطول الوقت تشوفين الريموت بايدك
منيره: سرحت شوي
رهف: بايش سرحتى
منيره: تخيلي رهوف اليوم صار لى شي من جد يفشل
رهف: اييييش
منيره: دخلت على سارا بالمقلط وكانت مع اخوها وشافنى
تغيرت ملامح رهف: أي اخو
منيره: عبدالله
ارتاحت رهف : يووووه فشيله
منيره: ادري والمشكله انى كنت اصارخ
رهف: ههههههههههههه.
منيره: بس تدرين هذي اول مره اشوفه واضح تصدقين حلو ماكنت اتوقعه كذا
رهف: عيب منور تراه متزوج
منيره: وانا ايش قلت .لحظه ليكون على بالك انى بحبه خخخخخ
رهف: لا يالخبله بس مو زين تقولين كذا
منيره: اقول ايش انه حلو . مافيها شي بس من جد حلو
رهف: مااظنه احلى من سلمان
منيره وهي معقده حواجبها: وانتى متى شفتى سلمان
رهف ارتبكت: هاه ايه ذاك اليوم يوم رحنا بيت عمي صالح وسلم عليك عند الباب.
منيره : شلون شفتيه وانتى جالسه بالسياره وانا الواقفه ما شفته بشكل واضح
رهف: والله شفته خلاااص مو مصدقتنى كيفك
منيره: طيب ليه مرتبكه ومعصبه
رهف: مو معصبه .
منيره: اقول انا بروح انام احسن لى
رهف: مابقى شي على صلاة الفجر
منيره: لا تخافين بصلى قبل.

.


يــــتــــبـــع

[إلميآسـه]

سالم مافتح سيره لعبدالعزيز . وكان السالفه الي صارت قبل يومين ماهي موجوده . سلمان علاقته مع لمى تحسنت . ورجعوا مثل اول. اما رهف جلست محتاسه عشان حفلتها الي بتصير الليله . وسارا لازلت تعامل مثل العروس ببيت بو عمر مو مقصرين معها وطول اليوم مع منيره ورهف سوالف ووناسه ويساعدون رهف بترتيبات الحفله الوضع بالبيت كان فوضى شوي . البنات من الصبح عند الكوفيرا عشان يسوون شعورهم ومكياجها . وبعد ما رجعوا جلسوا يلبسون ويتعدلون . على الساعه 7 ونص كانت سارا جاهزه ومخلصه راحت لمنيره بغرفتها شافتها واقفه وتشوف وجهها بالمرايه ومعصبه.
ساراا: ايش فيك
منيره: اووووووووووف بغسل شعري
سارا: لييييييه
منيره: ماتشوفين شلون طالع قلت لها تسوي لى تسريحه خفيفه مو قبه
سارا: هههههههه والله طالعه تهبلين
منيره: لا والله والا هالمكياج شوفي كانى مولان .
سارا: ههههههههه ايش دعوه
منيره: ماتشوفين وجهي ابيض كله اساس ورقبتى سودا.
سارا: صح الاساس كثير بس خففيفه
منيره: لا وع بسبح
سارا: يوووه ما يكفى الوقت الحين الساعه 8.
منيره: عادي .
سارا: وشعرك
منيره: بنشفه وبتركه مفتوح
منيره شعرها ناااااعم مره مثل ما يقولن خيوط لدرجه الي رولات تنحط بشعرها مستحيل ترول هالشعر .
سارا: والله حرام تسريحتك مو شينه
منيره: انتى قلتيها مو شينه يعنى مو حلوه
سارا: ماقلت كذا
منيره: ادري بس قسم بالله ان هالكوفيرا ما تستاهل شي . حسافه الفلوس الي عطيتها لها .
سارا: ههههههه
منيره: ليتى قايله لها تسولي لى مثلك شوفي شعرك طالع يهبل ومكياجك خفيف
سارا: والله انتى الي قلتى لها ابي اصير عروس الليله .
منيره: انتى الي طالعه عروس فستانك يجنن من وين شريتيه
سارا: من فرنسا
منيره: شافك عزيز
سارا: لا ليه
منيره: بيتخبل عليك اخوي طالعه تهبلين مره
سارا: هههههههههه سكتى بس ايش اهبل عادي شكلى
منيره: ما عندك سالفه . أي عادي يالله بس لا تعطلينى بروح اسبح مايصير تطلعين احلى مني
وغمزت لسارا
سارا: هههههههههههههههههه. وانا بروح اشوف رهف ايش مسويه
منيره: الي يشوفها يظن الليله ليلة عرسها
سارا: والله مادري من قال للكوفيرا زينينى كانى عروس
منيره: اقول انقلعي بس
طلعت سارا وهي تضحك وراحت لرهف بعد ماخلصت منيره نشفت شعرها على السريع بالاستشوار وحطت لها مكياج خفيف احسن من الصبغ الي حطته الكوفيرا .
رهف: يالله تاخرنا
منيره: اصبري شوي خل يجف شعري بالاول.
رهف: لازم اروح بدري.
منيره: روحي احد ماسكك
رهف: مين بيودينى
سارا: دقي على عبدالعزيز ياخذك
رهف: ماراح يرضى اعرفه
منيره: قولى لعمر مايقول لا . والا السواق
رهف: السواق مع امي ببيت نورا.
سارا: ليه ماراح تروح امي فوزيه
رهف: الا بتجي . بس اخذت مي لبيت نورا وبعدين بتجي مع نورا
منيره: طيب عمر وابوي
سارا: لا مايحتاج انا اقول لعبدالعزيز.
رهف: هو وينه الحين
سارا: انتوقع تحت كانى سامعه صوته .
رهف: خلاص قولى له .وانتى منور اسرعي
سارا: بروح اناديه.
وتو سارا طالعه من غرفه منيره الا تشوف عبدالعزيز راقي من الدرج.
سارا: ايه زين انك جيت
وقف عبدالعزيز وجلس يشوف سارا وهو مبلم( للترجمه يعنى فتح عيونه بقوه)
سارا: ايش فيك عزيز
عبدالعزيز: مافينى شي
سارا: ليه تشوفنى كذا
عبدالعزيز: هذا الفستان الي اشتريناه من باريس
سارا: ايه ليه فيه شي
عبدالعزيز: لا مافيه شي
سارا: طيب ليه كنت تشوفنى كانى لابسه ملابسى بالمقلوب
عبدالعزيز: ههههههه ماكنت اشوفك كذا
سارا: الا
عبدالعزيز: لا بس كنت مستغرب
سارا: مستغرب؟
عبدالعزيز: ايه مستغربماكنت اتوقع انك بهالجمال يوم تقايسين الفستان بالمحل ماكان حلو عليك كذا
احمر وجهه سارا : شكرا
عبدالعزيز: لانك حلوه
سارا: لا قصدي على المجامله
عبدالعزيز بنظرات تقتل وفمه مايل شوي: مو مجامله .
سارا: خلاااااص
عبدالعزي. باستغراب: ايش الي خلاص
سارا: لا تقول كذا ولا تشوفني بهالنظرات
عبدالعزيز: ههههههههههه ياحليلك ياساراتدرين لازم تخلين امي تقرى عليك عشان ما تجيك عين


يـــتــــبـــع


-

[إلميآسـه]

طلعت رهف من الغرفه .
رهف: انا على احر من جمر وانتوا تتغازلون
عبدالعزيز: وانتى ايش لك فينا انا وزجتى نتكلم ليه رازه وجهك
رهف: عندكم غرفه سوا فيها الي تبون .
سارا خلاص راحت فيها: ررررررررهف
رهف: هههههه والله انك خبله
عبدالعزيز: انتى الخبله .
رهف: ايه هي لها المدح وانا الطناز . والا اليوم حفلتى ولا حتى علقت على شكلى
عبدالعزيز: ايش اعلق عليه شكلك عادي مثل كل يوم
رهف: حررااااااااام عليك
سارا: ههههههههههههههه
رهف: تشوفين انتى الثانيه قاعده تضحكين على
سارا: انتى جبتى هالشي لنفسك
رهف: المهم بتودينا عزيز
عبدالعزيز: اوديكم وين
سارا: للحفله
عبدالعزيز: لا اسف انا مستعجل روحوا مع السواق
رهف: السواق مع امي
عبدالعزيز : عندكم عمر ياخذكم
سارا: فشيله عزيز
عبدالعزيز: لا عادي بتروحين مع خواتى واخوي مافيها شي. يالله انا جاي مستعجل ابدل واطلع
سارا: طيب نزلنا بالطريق
عبدالعزيز: امم. طيب بسرعه
رهف جات لخوها وحبته: مشكوووووووووووور يااغلى اخ بالدنيا
عبدالعزيز: المهم اسرعوا
سارا: اكيد.
دخل عبدالعزيز غرفته وراحت معه سارا . اما رهف رجعت غرفة منيره
رهف: منووووور بسرعه يقول عبدالعزيز
منيره: يووه شعري مابعد يجف. صبروا
رهف: يقول عزيز اذا مااسرعوا ماراح يوصلنا
منيره: عمر يودينا . انا دقيت عليه وقال طيب
رهف: خلاص بروح انا وسارا مع عزيز وانتى تعالى مع عمر
منيره: بلا سخافه مابي اجي لوحدي .
رهف: مايصير كذا .بتاخرينا
منيره: ماراح اتاخر ربع ساعه واكون جاهزه . تكفون رهوف لاتروحون عنى انتظرونى
رهف: اوووووف طيب بنتظرك
دخلت عليها سارا وهي خلاص لبست عباتها .
سارا: يالله عزيز نزل . بسرعه
رهف: خلاص قولى له يروح بنجي مع عمر
سارا: ما يصير. خل نروح مع عزيز
رهف: الاميره مابعد تخلص .
سارا: منور انتى لحقينا
منيره: لا سارا بلا سخافه ابي اروح معكم
سارا: يووووه .
دق جوال سارا.
سارا: هذا عزيز اكيد هو بالسياره الحين
رهف: خلاص قولى له ان عمر بياخذنا
ردت سارا على عبدالعزيز.
عبدالعزيز: وينكم يالله لا تاخرونى
سارا: خلاص عزيز روح بنجي مع عمر .
عبدالعزيز : براحتكم مع السلامه .
وسكرت سارا من عبدالعزيز . بعد ما انتهت منيره . ومرت الربع ساعه والى الحين ماجا عمر . دقت منيره عليه ولا يرد دقت على ابوها الي كان بالاستراحه وسالته عن عمر . وماكان يعرف مكانه . ومارضى يجي ياخذهم للحفله .
رهف: كل منك منور والحين مين بيودينا
منيره : وانا ايش درانى ان عمر بيختفى هو قال لى انه بيجي .
رهف: والحين ايش نسوي
سارا: اخلى السواق يجينا
رهف: السواق مع امي
سارا: لا قصدي سواق اهلى .
منيره: لا فشيله اكيد امك ومها يحتاجونه الحين
سارا: ادق على البيت واشوف
دقت سارا على بيتهم . رد عليها سلمان
سارا: السلام عليكم
سلمان: وعليكم السلام . هلا والله
سارا: هلا فيك .اقول سلمان امي وينهي.
سلمان: موجوده قاعده تلبس ليه
سارا: لا بس ابي ترسل لى نزار عشان اروح للحفله
سلمان: ليه ماعندك احد .
سارا: لا عبدالعزيز مشغول والسواق مع امي فوزيه .وعمي سالم بالاستراحه وعمر مادري وينه
سلمان : ناوي تروحين مع عمر
سارا: معي رهف ومنور
سلمان: اها خلاص ولا يهمك برسل نزار الحين
سارا: يمكن امي تحتاجه
سلمان: لا تخافين ما تحتاجه الحين
سارا: مشكووووووووووووور يالغالي
سلمان: ههههههه العفو
سارا: اوكي يالله باي
وسكر سلمان السماعه وهي يبتسم . راح عند المرايا الي عند المدخل وعدل شماغه وتعطر طلعت لطيفه وشافت ولدها قاعد يكشخ
ام محمد: على وين مو تقول انك مو طالع الليله
سلمان: الله ايش هالزين يمه بتغطين على الموجودات بالحفل
ام محمد: هههههه انت عليك لسان يقطر عسل طالع على ابوك
سلمان: هههههههههه ادري
ام محمد: ماقلت لى وين رايح
سلمان: عندي مشوار بروح له وبرجع تبين شي
ام محمد: لو فاضى وصلنا للحفل
سلمان: عندكم نزار يوديكم يالله يمه عن اذنك ماقدر اتاخر .
وطلع من البيت وركب سيارته هي يصفر.

رهف: ما يصير كذا تاخرنا مررره
سارا: الحين نزار بالطريق
منيره: تتوقعون وين عمر ليه ما يرد .والله انى خايفه عليه
رهف: كل منك انتى
منيره: ايش كل منى . والله انك فاضيه
دق الجرس .
سارا: اكيد هذا نزار .
رهف: واخيرا انا بروح اركب السياره .لا تتاخرون
سارا: طيب
ونزلت رهف عشان تركب السياره .



ايش بتسوي رهف اذا ركبت السياره؟
وسؤال الحفل ينعاد مين الي بيسبب صدمه بالحفل ومين الي بينصدم


-

[إلميآسـه]

الفصل السابع

الجزء الثانى

رهف: ما يصير كذا تاخرنا مررره
سارا: الحين نزار بالطريق
منيره: تتوقعون وين عمر ليه ما يرد .والله انى خايفه عليه
رهف: كل منك انتى
منيره: ايش كل منى . والله انك فاضيه
دق الجرس .
سارا: اكيد هذا نزار .
رهف: واخيرا انا بروح اركب السياره .لا تتاخرون
سارا: طيب
ونزلت رهف عشان تركب السياره .
.
منيره وهي تلبس عبايتها: سارا انا مو متطمنه.
سارا: ليه
منيره: عمر ما جا ولا رد عليّ
سارا: اكيد شي شغله
منيره: مو من عوايده انا اعرفه زين
سارا: انتى لا تحاتين يالله خل ننزل لا تعصب رهف علينا وتروح وتتركنا.

وقفت رهف برى محتاره ماشافت الفورد حقت السواق. كانت في سياره رياضيه سوده واقفه عند باب بيتهم بس اكيد انها مو للسواق. ياربي بتاخر عن هالحفله لاحظت شاب سعودي جالس بالسياره الي عند الباب فما حبت تجلس تنتظر السواق برى البيت . رجعت داخل الا تقابلها سارا ومنيره .
سارا: ها ماجا نزار
رهف: اوووووووف. لا
سارا: غريبه تاخر يووه هذي سياره سلمان ايش يسوي هنا
من اول ما نطقت سارا باسم سلمان فز قلب رهف من مكانه وقام يدق بصوت عالى لدرجه خافت ان الي حولها يسمعونه.
منيره: متاكده
سارا: ايه. ليه جالس بالسياره وايش عنده جايلحظه اشوفه
راحت سارا لسياره سلمان وفتحت الباب الي جنبه . انفجع منها سلمان لانه ما حس فيها كان مشغل المسجل على اعلى شي ولا لاحظها .
سلمان: وجع خرعتينى
سارا: ايش تسوي هنا
سلمان مو قادر يسمعها من الصوت العلى راح وطى على الصوت .
سلمان: ايش قلتى
سارا: اقوووول ايش عندك هنا
سلمان: لا ابد قلت اوديكم الحفله
سارا: لا والله شايفتك كريم
سلمان: دايم كريم انا
سارا: ليه وينه نزار
سلمان:امي تبيه قلت اجي انا اوديكم
سارا: وليه ما دقيت علي
سلمان: دقيت الجرس
سارا: لا والله وليه انشالله ماعندك جوال
سلمان: مادري ماخطر على بالي وثانيا ليش خساير مادام في الباب جرس
سارا: اها.طيب انا معي منور ورهف
سلمان: واذا عادي. انا مو غريب اذا ما تبينى اوديك ترى بروح
سارا: لالا زين انك جيت دقيقه اناديهم انتظر لا تروح
سلمان: خذوا راحتكم ماوراي شي
سارا : غريبه انت مو طبيعي اليوم
سلمان: اعجبك انا بوقت الشده
سارا: وراك شي .
سلمان: يالله بس قدامي روحي نادي البنات ترانى مو سواق انتظر
سارا: هههههههههههه.ايه هذا سلمانوه الي اعرفه
رجعت سارا لوين ماكانت رهف ومنيره واقفات عند الباب.
سارا: يالله نروح
رهف بتخرع: مع اخوك
سارا: ايه نزار مع امي . سلمان بودينا
رهف: لا فشيله مب رايحه
منيره: ايه فشيله
سارا: أي فشيله انتوا بعد ترى تاخرنا وماعندنا غيره
رهف: عمر بيجي
منيره: هيه سارا معها حق عمر الى الحين ماجي ومادري اذا بيجي او لا. خل نروح مع سلمان احسن
رهف: انتوا روحوا انا بجلس انتظر يمكن يجي
سارا: اقول رهيف بلا حركات ماصله قدامي اشوف
رهف: يوووه والله فشيله
منيره: خلاص اجلسى لوحدك حنا رايحين
وطلعت سارا ومنيره وراحوا للسياره ركبت سارا جنب اخوها قدام اما منيره جلست ورى سيت سارا . يوم لاحظت رهف انها واقفه وحدها وشكلها غلط لحقتهم واضطرت تجلس ورى سلمان . بعد ما مشت السياره والوضع مره هدوء
سلمان قطع السكوت الي كان عام عليهم : تبونى اخذكم للسيف
سارا: ايه
سلمان: وهالعزيمه حقت ايش
سارا: حفلة تخرج رهف.
سلمان: لا مبرووووك


يـــتـــبـــع

[إلميآسـه]

مع ان سلمان يدري ايش مناسبة الحفل بس كان يستغبي . وده يسمع صوت رهف بس البنت مو معطته وجهه ومو راضيه تتكلم ابد . جلسوا طول الطريق منيره وسارا يتكلمون حتى يوم وجهت سارا سؤال لرهف ردت عليها بصوت مره واطي لدرجه سلمان الي قدامها ما سمعها وهذا الي قهر ه ايش سالفتها تستحى مني اكنت اظنها جريئه بعد الموقف الي صار بيننا في ليلة زواج سارا . رهف الي ما كانت مرتاحه ابد . مو قادره تشارك منيره وسارا سوالفهم رفعت راسها للمرايا الي قدام وشافت سلمان وهو يسوق كان مندمج بالسواقه ماكنت باينه بالمرايا الا عيونه . مثل عيون سارا بالضبط. كبار وواسعه وكانها مكحله . بس الفرق ان عيون سلمان اسود غامق وسارا بنيه . حست بقوه بهالعيون تجذبها لدرحه ما قدرت تشيل عينها عن المرايا . وكان سلمان حس فيها شاف المرايا وطاحت عينه بعيونها . وابتسم لها على طول لفت رهف لجهه النافذه وقامت تتامل السيارات وهي تسب نفسها انا ايش سويت عرف انى كنت اشوفه يووووووه ايش قصتى مع هالانسان . لازم تصير لى هالمواقف البايخه معه ما يصير.حست انها لازالت مراقبه مو قادره تلف راسها او تتحرك كانت عيون سلمان لازالت عليها . ينتظر منها لفة ثانيه على المرايا. وده يكلمها بس وجود سارا ومنيره يمنعه . لو بده وقف السياره ونزل هالثنتين وجلس يسولف معها . تذكر صقعتها به بالدرج وابتسم شافته سارا وهو يبتسم .
سارا: ايش عندك تبتسم
انتبه لها سلمان وكانه قايم من حلم .
سلمان: لا بس تذكرت موقف صاير لى
سارا: وهالموقف يضحك
سلمان: امممم تقدرين تقولين عنه محرج
سارا: وليه تبتسم طيب
سلمان: لانى يوم ذكرته الحين لاحظت كيف هو محرج لدرجه تضحكين منها
سارا: الله الله شكل الموقف مو سهل
سلمان: ههههههههههه تدرين ايش لو يقولون لى اعيد هالموقف ما اقول لا
سارا: توك تقول محرج
سلمان: ايه هو محرج بس مو لى
سارا وهي عاقده حواجبها: شلون ما فهمت
سلمان: ماراح تفهمين .
سارا: طيب قوله لى عشان افهم
سلمان: امممم طيب مره كنت نازل من درج
رهف كانت قاطه اذنها وتبي تسمع ايش بيقول سلمان وعيونها لازالت على النافذه . اول ما سمعته يقول درج لفت وجهها وشافت المرايا وهي فاتحه عيونها على الاخر يعنى عرفنى
سلمان: ههههههههههههههههههههههههههههههه.
سارا: ايش فيك كمل
سلمان: لا بعدين بعض الناس بيزعلون .
وغمز لرهف بعينه تمنت رهف تنشق الارض وتبلعها رجعت تشوف النافذه وهي خلاص رايحه فيها . ايش قصده بكلامه .سارا ومنيره مو حاسين بالي يصير حولهم
سارا: أي ناس
سلمان: ناس عزيزين علي .
سارا وهي خلاص مستغربه: مين .
سلمان: اقول سارا خلاص مو قايل السالفه وبلا هذره واجد .يالله أي قاعه ترى وصلنا .
سارا:القاعه الرابعه.
وقف السياره عند الباب
منيره: مشكور سلمان ما قصرت
سلمان: العفو ما سويت شي.
سارا: بتجي تاخذنا
سلمان: اقول ترى عطيتكم وجهه
سارا: يمه امزح . مشكور اخوي
ونزلوا من السياره . اما رهف نزلت وهي بعالم ثاني مو حاسه بنفسها ابد ايش قصده بعزيزين عليه يعنى انا عزيزه بالنسبه له . هو يقصدنى ليه هالموقف ماصار الا معي يوووه من جد احراج . شلون عرفنى بس.
دخلوا البنات للقاعده راحت منيره وسارا للحمام عشان يعدلون زينتهم ورهف راحت فوق عند البنات شافتهم مجتمعين كلهم فوق. كانوا 6 بنات مشتركات بالحفله مع رهف طبعا هنادى وندى صديقات رهف المقربات . ونجلاء وسلمى وافنان كلهم دارسين مع بعض وبالثانوي ومكونين شله . دخلت رهف وهنادي ونجلاء علوم طبيه . اما ندى هي الدافوره بينهم دخلت طب . وسلمى وافنان دخلوا دبلوم نظم معلومات وحاسب الى
ندى: واخيرا تكرمتى وصلتى . وينك
رهف : ليه تو الناس
هنادى: رهوفه ايش فيك
رهف: ايش
هنادي: وجهك مره احمر
رهف: هاه لا بس حرانه
نجلاء: يالله بنات لازم ننزل نشوف المعازيم وترتيبات الحفله .
ندى: امهاتنا وخواتنا تحت
نجلاء: ولو فشيله .
ونزلوا البنات كلهم وكل وحده تقول الزود عندي . من جد كانوا حلوات مع ان كل وحده فيهم لها شكل هنادى بنت طيوووووبه مره بس دبدوبه وشعرها كرلى ومع كذا سمنها محليها . اما ندى فهي الجديه ولابسه نظارات طويله ما تحب الشعر الطويل ودايم تحلقه قصير مره .يعنى ندى عكس شخصيه هنادى بالضبط مع كذا هم ورهف من اعز الصديقات باقي الشله نجلاء حبوبه عيبها انها غياره . تحب تكون الانظار حولها دايما . افنان العنصر المخفى نادر ما ينسمع صوتها . هاديه لابعد الحدود . اما سلمى هي ملقوفه الشله وتحب السوالف لدرجه كبيره ماهمها اذا كانت سوالفها بايخه اهم شي تقول سالفه فضوليه لابعد حد . هالمزيج المختلف المتضارب مكون اجمل شله بالمدرسه الكل انظارهم عليهم ويتمنى يصادقهم . رهف اجتماعيه مره وكل المدرسه تقريبا صديقتها . مو مثل منيره اختها الي كافيتها صديقه وحده الي هي سارا . بعد ما نزلوا البنات للقاعه الي كانت مزينه بطريقه مره حلوه ورايقه .المعازيم ما بعد يجون كلهم . والقاعه شوي فاضيه . كانت الطاولات مصفوفه بشكل مره حلو وعلى كل طاوله الحالى والمالح . وكل القاعده الوانها زهريه ودرجاتها كانوا جايبين لهم نديبه اول ما يدخلون المعازيم من الباب يشوفون كتاب موجود عند المدخل يكتبون فيه كلمات للخريجات السته والخريجات بالاستقبال ويسلمون عليهم . بعد ما امتلت القاعده والطق قايم على حدود الساعه 11 ونص . راحوا الخريجات فوق ولبسوا ارواب وقبعات التخرج . ونزلوا على شعر مكتوب فيهم . انتهت الزفه وكل خريجه راحت لعند اهلها ام عمر وام محمد كانوا جالسين بطاوله معهم عايشه اخت سالم ونوره وهدى ومها . اما سارا ومنيره جالسين مع صديقاتهم .كانت الدنيا ربشه ووناسه والكل يرقص ويلعب . الطقاقه مو مقصره محييه الحفل زين منيره لازالت متضايقه على موضوع اخوها ليه ما يرد عليها وايش قصته اكيد صاير له شي ماحبت تقول لامها عشان ما تخوفها يوم شافت الوضع طال والى الحين ما سمعت شي عن عمر دقت على عبدالعزيز عشان تساله


يـــتــبــــع


-