روايه ملامح الحزن العتيق

[ღღحفيدة ملوك ღ]

قال : ابوي حلف مااردك وانك لتروحين حلف مااردك وانك لتروحين مع الواطي هذا يعني ياسارة تطلعين مع واحد فاسد ووسخ وانا اطالع ومااقدر اسوي شي .
وقف على حيله وناظر في عيونها ووجهه ينضخ بالدم الفاير والعصبيه وفورة الدم والغضب الجامح دلاله واضحه عليه
عاجز قدام ابوه ويمينه اللي شهره في وجهه
مسك يدها وشد عليها وغمض عيونه بقوة وهو يحاول يضبط اعصابه
قال : انتبهي على نفسك ياسارة انتبهي من خالد على قد ماتقدرين لاتقولين زوجي وماراح يضرني . وانا ماراح اخليك .
امتقع وجهها من الخوف والحيرة والاستغراب
شعور غريب اجتاحها وهي تتخيل خالد يضرها ولايأذيها
حاولت ترفض الصورة وتبعدها بس وجه مشاري مايعطيها فرصة حست ببرودة تسري في اطرافها قالت ببرود وخوف مكبوت وهي تبتسم : مشاري ليه تقول كذا ؟
طلع سيجارة ووقف قال : خالد وسخ ياسارة ومايستاهلك
وبردة فعل سريعه دخلت اطراف اصابعها السبابه من كل يد في اذانيها وهزت راسها بمعنى ماابغى اسمعك
اعطته ظهرها وطلعت فوق
تجر خطوتها
مشاري خوفها
بث الخوف بدل الفرح
وبث الهم بدال السعادة اللي المفروض تكتسيها هالليلة بشوفة الحبيب وقربه
حطت يدها على قلبها وهي تحس نبضاته تعلو
" الله يستر الله يستر هذا اللي كنت خايفه اسمعه من مشاري "
قالتها وهي تاخذ عبايتها وتطلع متردده تكمل وتكتشف بنفسها ولا تتراجع ثم تحرم نفسها من حلم وتحرم خالد من طلب و رغبه

***

[ღღحفيدة ملوك ღ]

متمدده بسريرها وعيونها ذبلانه والنوم قريب منها !
وامها تمسد لها شعرها بحنان وهي في قمة انسجامها بحركة امها اللي عودتها عليها من صغرها
: ماادري ياشادن خايفه انهم ياخذونك مني !!
: يمه الحين كم عمري ؟ بعدين حالتي عاجبتك هنا ولا تبيني اتشحطط في بيت ابو مشاري وابهذل مشاري اما يروح للطايف ويتحجج بشغل ابوه وهو في الحقيقه عشان يخليني على راحتي ولا كل شوي عمي ينادي اذا بغى يطلع ولا ينزل
قاطعتها امها بخوف وحيرة : بس ياشادن اقدر اشوفك متى مابغيت .
: يمه تشوفيني خايفه ومو آمنه وعند الناس اللي ماتربطني صله الا الجيرة ولا اغيب عنك اسبوع اسبوعين الين ربي يفك سجن نايف وانا مرتاحه وبأمان .
: انتي تعرفين اهل ابوك حتى تضمنين راحتك عندهم .
: يايمه ياحبيبتي اهل ابوي اقل شي انهم بيخافون علي بيحموني مو مثل صالح وخالي انا بنتهم وشرفهم وعارهم ماراح يخلون أي شي يمسني ولا تنسين ان جدتي للحين عايشة يعني راح اسكن معاها مو مع الناس .
: انتي روحي لدوامك عادي وحاولي تسألين عنهم من دون ماتحسسين احد بشي خايفه عليك ياشادن ماابغاك تروحين الا وانتي ضامنه انهم بيكرمونك وماراح يهينونك .
: حاضر وابشري ولا يهمك يااغلى الناس . ماعاد فيه اهانه اكثر من اهانة خالي وصالح بعدين تراني اقوى منك لاتخافين عليّ .
ابتسمت امها بحنان وحب وفخر قالت : ايوه بأمارة كلامك مع خالك اول مرة اشوفه يتكلم بارتباك وخوف
: مو اللي قواه عليك ضعفك وخوفك منه لو بس مرة تقولين له لاااا واعلى مافي خيلك اركبه كان مايمديه تمادى والله يايمه خالي ماعنده الا الكلام والتهديد ولا مافي يده شي يسويه لنا .
: ماعليك من خالك ولاتفكرين الا بنفسك يالله حبيبتي نامي عشان تصحين نشيطه
وقفت امها بعد ماطبعت بوسة بين عيونها وقفلت النور قالت شادن بهمس والنوم بدا يداعب جفونها : يمه .
: هلا عمري .
قالت بصوت ذبلان : لاتخافين على بنتك ولاتشيلين همها ووعد يمه اذا ماحسيت نفسي مرتاحه لارجع لك واسوي اللي تبغينه .
رجعت امها وحضنتها بقوة على صدرها
بنتها طالعه لابوها
كان شجاع ومايهاب
كان قد المواقف ويعتمد عليه
اشوا ان عيالها طلعوا على ابوهم وماطلعوا عليها ولا ماعاشوا وشقوا طريق حياتهم بين صالح ومحمد !
كان جوابها لبنتها تنهداتها اللي تبث من خلالها تيارات حنان ساخنه
تطفي كل ذرة حزن او تعب في جسد وقلب شادن
همست : تصبحين على خير يمه .
: وانتي من اهله ياروح امك .
طلعت امها من عندها والفخر والفرح ببنتها ينتشلونها من تفكيرها بالظلم والقهر وسطوة اخوها وزوجها !

***

[ღღحفيدة ملوك ღ]

في مطعم يامال الشام وقريب من كورنيش البحر الاحمر
مستحيه
وخايفه .
على كثر ماتمنت قرب خالد بليلة حالمة وشاعرية مثل هذي الا انها كارهه الوضع وتتمنى تفز وترجع للبيت
قلق مشاري عليها خوفها وخرب عليها يومها كله
بلع خالد لقمته بصعوبة وشرب من كاس البيبسي اللي قدامه وهو يطالع فيها
قال : وش دعوة مستحية ؟ يالله كلي تراني خالد اللي كل يوم يكلمك ويسولف معاك .
طالعته ياكل بارتياح وهو ابعد مايكون عن الشاعريه والجو الحلو واحساسه بوجودها !
تذكرت وجه مشاري اللي يحمل تعابير القلق والخوف الحقيقي
قالت بخوف : خالد بنرجع .
بلع لقمته بصعوبة وهو يقول :الله يلعنك يامشاري وين نغصت عليّ هه
رمى الشوكه من يده وطلع المصاصة من الكاس وشرب البيبسي جرعه وحده
دق جوالها وشافت اسم مشاري يزين الشاشة وابتسمت
" لازم ارد تطمنه انها بخير ومو مثل ماتوقع "
مد يده ومسك يدها قبل لاتفتح الزر الاخضر قال : طلبتك وعشان خاطري لاتردين عليه
: بسس .
قاطعها وهو مكشر : انا ادري انه مشاري خليه يتعلم ان الوقت هذا خاص بيني وبينك محد له دخل فيه .
: خالد الله يخليك يكفي انه زعلان من خرجتنا مع بعض مايصير اطنشه .
: واذا قلت عشان خاطري
لوت فمها وبضيق تركت الجوال اللي الح عليها ودق اكثر من خمس مرات ورى بعض
تدري ان مشاري يغلي ومو مطمن
وتدري انها زادت قهره قهر
سحب جوالها وقفله نهائي وعلى شفايفه ابتسامة نصر
ابتسم لها قال : سارة تعشي !
: ها . ؟ ممم خلاص شبعت .
: وش اللي شبعتي انتي مااكلتي شي حتى تشبعين .
ابتسمت له من ورى قلبها وهي تهز رجلها بتوتر وقلق

[ღღحفيدة ملوك ღ]

قالت : ماعليه خالد خلنا نرجع للبيت الله يخليك .
طالع بالساعه واعترض بتكشيرة و: لا سارة بتزعليني منك الحين اللي يشوفك مايقول هذي اللي دايما تترجاني وكل شوي تقول تعال تعال .
غمضت بقلق وعدم ارتياح قالت : خالد ماعليه مرة ثانية الايام جاية . بعدين لاتنسى زواجنا خلاص ماباقي عليه شي .
وقفت قالت : بروح اغسل على بال ماتحاسب
وقف ومد يده عليها قال : اجلسي بس خمس دقايق وش مستعجلة عليه .
واضطرت انها تذعن لأمره وجلست
اخذ جواله ووجهه عليها قال : القمر ليه كذا مكشر ؟
رفعت حاجبها باستغراب
لأول مرة خالد يجي على لسانه كلمة غزل
انصدمت وهي تطالع بجواله موجهه عليها ويحاول يوزنه على وجهها
: خالد اش قاعد تسوي ؟
: بصور زوجتي فيها شي . بالله ابتسمي وشيلي هالتكشيرة .
: من جدك ولاتمزح ؟
: لا من جدي مافيها شي اذا اخذت صورة زوجتي معاي ابي انام عليها واصبح عليها .
غطت وجهها ووقفت قالت : لو سمحت خلنا نمشي .
: تعالي هنا . وش فيك زعلتي ؟
اخذت شنطتها وهي تغلي من الغضب قالت بعصبيه : المفروض انك انت اللي تحرص ان صوري ماتدخل الجوال مو تحطها بيدك .
: وش فيها اذا دخلت الجوال ؟ ترى هذا جهازي وماراح ابيعه تطمني ولا يمسكه احد غيري
فتحت جوالها وعلى طول دق وفتحت الخط على طول : ايوه مشاري هلا والله
تنفس مشاري بعمق قال : ليه ماتردين وليه قفلتي الجوال ؟
: اذا رجعت اقول لك .؟
: سوى لك شي هالوسخ .
: مشاري الحين انا نازلة وهمست : تطمن محد يقدر يسوي لي شي وانا اخت مشاري .
تنهد من قلب وبارتياح قال : زين يالله انزلي بسرعه انا برا .
نزلت على بال مايحاسب خالد ولحقها يجري
: سارة انتظري دقيقه آسف يابنت الحلال والله آسف .
: خلاص خالد انا برجع مع مشاري .
مسك يدها قال : تعالي تعالي انا اللي بوصلك مثل ماجبتك لاتنسين اني عطيت ابوك كلمة .
: لا خالد .
قاطعها : خلاص ياسارة والله آسف اركبي بس معاي .
اضطرت انها تركب سيارته وتتفادى انتباه الناس وعيونهم اللي انغرزت على يده وهي ماسكه معصمها
دقت على مشاري قالت : هلا مشاري ماعليه برجع مع خالد للبيت ارجع انت .
: اووووووف زين انا وراكم .
: اوكي .

[ღღحفيدة ملوك ღ]

التفتت عليه قالت : بيمشي ورانا لاتسرع اوكي .
تنفس بضيق قال : ياذا مشاري اللي علني من الحين هذا وانا مملك خالص اجل وشلون لو انا ماملكنا للحين وش بيسوي الحين هو ليه مايبي يفهم انك زووووجتي ياعالم زوجتي وداخل بيني وبينها وكأني ارتكب حرام اذا شفتها ولا قعدت معاها
: خالد انت تدري ان ماباقي الا كم شهر واصير زوجتك وفي بيتك يعني محد بيحاسبك على شي بس الحين انا في بيت ابوي ومحد يضمن الدنيا ومشاري معاه حق يخاف عليّ
قاطعها : يخاف عليك مني وش بسوي لك انا ؟
: يعني اقل شي من كلام الناس اللي مايرحم
: الله يعينك ياخالد طلعت الاخت اخس من الاخو .
: خاااالد
: خلاص خلاص سكتنا .
اطبق الصمت على جو السيارة لحد ماوصلوا بيت ابو مشاري
نزلت سارة ودخلت البيت وهي في اشد حالات ضيقها .
اما مشاري فجلس في سيارته وهو يتأملها تدخل ومشيتها السريعه تدل على غضبها .
محد فاهمه ولحد يبغى يفهمه
سارة ماتصلح لخالد ولا هو يصلح لها
حط راسه على الطارة . .
الدنيا ضايقه فيه
بس خلاص اليوم راح يحط النقط على الحروف وينهي الموضوع
ومصلحتها فوق كل اعتبار .
سواء صدمتها ولا نفسيتها ولا حياتها بعد كذا واسم مطلقه اللي راح يلازمها لأجلٍ غير مسمى !
لو خالد يتوب كان غفرنا وسامحنا ونسينا بس المشكله انه يتمادى يوم عن يوم وسمعته صارت في الحضيض وهو يعتبر متزوج وبعد فترة قصيرة المفروض يدخل بزوجته .
شغل سيارته وكأنه لو هرب من المكان هذا راح يهرب من التفكير والموضوع كله
لف من ورى بيتهم يبي يمسك طريق يودي للمسجد لعله اذا قرأ قرآن تهدا نفسه ويدله ربي على الطريق الصحيح الأخف ضرر سواء على سارة ولا امه وابوه
اخذ بريك ووقف فجأة بين البيوت
هاله المنظر اللي قدامه
ماتردد لحظة وحده انه ينزل من السيارة
وراح يجري بسرعته كلها
وكأن شياطين الأنس والجن اجتمعت قدامه وراح يهجم عليها ويبديها عن بكرة ابيها !
اول ماوصله هجم عليه كالأسد مو ناقصه الا الزئير ثم يفترسه بيدينه ورجوله وأسنانه
وجه لوجه خالد لكمات عديده وضرب في كل مكان قدرت يدينه تطوله
ورفسه برجوله بهستيريا

[ღღحفيدة ملوك ღ]

مسكه من حلق ثوبه ووقفه ودفه لحد ماثبته على جدار بيت جارهم ابو عدنان .
تكلم خالد وهو مخنوق ونفسه يضيق : م م مشاري بتذبحني .
دمعت عيونه من وجع الموت اللي دنى وقرب بسبب قضبة يد مشاري على حلقه
التفت مشاري على عدنان اللي في يده خمسين ريال قال : ارم الفلوس اللي في يدك على الارض ويالله روح على البيت .
تكلم عدنان اللي عمره مايتجاوز 12 سنه وهو يرتجف خوف من مشاري المجنون
قال : انا مالي صلاح هادي فلوسو اداني هيا وقال انو بكرة حيجيب لي هدية لأنو يحبني وكمان قال لاتقول لاحد
بثورة مجنون وهيجان غيور على دينه واهله وجيرانه صفعه مشاري على وجهه اكثر ووجه له لكمات مجنونة اقوى ، صعب ان خالد يقدر يقاومها او يردها
يمكن تشفي شي قهره من يوم شافه في شقة اخته مع ولد الحارس الافغاني
: ياوسخ ماتخاف ربك ياواطي تهز عرش ربي جهاراً نهاراً
يادنيء ياسافل ماخذ اختي ليه وانت شاذ تدور الأطفال واشباهك .
تقريباً فش شي من غليله بعد نص ساعه من الضرب المتواصل ولولا حضور ابوه بعد ماناداه عدنان وانقذ خالد منه ولا كان استمر للفجر او لحد مايسكت خالد ويصير جثه هامده
: مشاري مجنون انت تسوي بالرجال كذا ؟ المفروض انا وديناه المستشفى مو نخليه يركب سيارته بهالحال الرجال يمكن يموت بسببك .
مسح العرق المتصبب من وجهه بمنديل قال : ماتدري يبه وش مسوي .
رمى ابوه العقال بشماغه على الكنبة
قال : علمني سوى شي لاختك ؟
: لا يبه ماسوى لها شي ؟ بسسس
: بس ايش بتتكلم ولا لا .
خلاص ماعاد فيها
اول كان يداري ويحاول يمهد للموضوع حتى مايرتفع السكر عند ابوه وتصير مضاعفات وكان يمهد للموضوع بطريقه احسن من كذا
بس اليوم ماعاد فيها أي تردد !
حكى مشاري لابوه السالفه
وبداية شكوكه
وحكاية ولد الحارس وكلام اصحاب خالد عنه وان له باع طويل في الوباء هذا
رمى ابو مشاري نفسه على الكنبة باحباط وقهر
حط راسه بين يدينه وزفر بآهة موجعه
قال بخيبة واحباط : طالما هذا طريقه اش يبغى في بنات الناس .
: يبه خالد ماخطب سارة الا بعد ماتحدى مع واحد من اصحابي لمن قال اني بلغت الهيئة عن رقم السيارة اللي خطفوا اصحابها الولد من الدانوب تتذكره ؟
: ايوه اتذكر بس اش دخلك انت بانتقام خالد
: هذولا اصحاب خالد والمفروض انه معاهم ماعرفت بالموضوع هذا الا من احمد صاحبي لمن عرف انه ملك على سارة .
كانت المصيبة عظيمة على الأب والاخ ومالها أي تعبير ووصف .
رد ابوه بأسى : لا اله الا الله كل هذا يطلع منك ياخالد . والله ان اهله من احسن الناس وابوه انسان فيه خير ويسكن في المسجد اكثر من سكنه في بيته .

[ღღحفيدة ملوك ღ]

: ابتلاء يبه عسى الله يعافينا .
: الله يهديه ويستر على عيال المسلمين . اسمع ياولدي كلم سارة امراً مو طلباً انها تقطع مكالماته بدءاً من هذي اللحظة . وطلاقها راح يتم لو على قص رقبتي .
: ابشر يبه بس ترى سارة
قاطعه ابوه بتفهم : لاتشيل هم سارة الايام تعلمها وابن آدم معرض للمشاكل والمصايب خلها تاخذ درس في الحياة وتتعب شوي ولا تتعب طول عمرها .
: زين يبه متى بتكلم اهله حتى يطلق سارة .
ضغط ابو مشاري بيدينه على وجهه
قال : خل الامور تهدى الحين وان شاء الله مايتم هالزواج ! الخوف ان خالد يشتكي عليك . ولايفكر ينتقم منك .
: ماراح يشتكي لأنه بيفضح نفسه وانا متوكل على ربي لاتخاف عليّ .


***
يوم ثاني !
الجو اليوم في جمس ابو بدر غير عن جيمس
بوسعد .
هناك اميرة ومشاكلها ،
نادية وخوفها ،
وفاطمه ونصايحها ،
ونورة وتعبها وتأوهاتها بين فترة وفترة ،
وسارة ونومها
اما الجو هنا ركووود والكل نايم كل شوي خلود اللي راميه غطاها من بدري تقوم وتتمطط وتشوف الطريق وساعتها وترجع تناام .
تذكرت انها بتروح لمكان جديد وغريب
وجه المديرة نوف وعبوسها ونظراتها لها
تذكرت سااارة انها اليوم مو معاها
فعلاً وحيدة وغريبة ومالها بهالدنيا حظ
وكأن الحظ يمشي بعكس اتجاهها
بس خيط الامل ماانقطع وهي تمني نفسها بعمانها واهلها اللي بيوقفون معاها ضد الزمن
اخيرا طلع النور وقدرت تشوف القرى اللي يمرون فيها قريه ورى قريه
قرية العدل
قرية السلام بعدها بمسافه قصيرة
وصلوا لقرية السبيل
تمنت لو بكيفها وبيدها وتنزل هنا وتروح عند زميلاتها .
قرية عين المها قد ايش حلو هالاسم
بس خسارة مافيها الا كم بيت وينعدون على الأصابع والغنم فيها اكثر من الناس .
يوم مشرق جديد بس الشمس مختفيه من اول ماقربوا من القرى النائية عن جده ومكه والطايف
كل مااقتربوا من القرى القريبة من السبيل والاجواد والجو يزداد جمال وفتنه واغراء
الغيوم في السماء ملبده

[ღღحفيدة ملوك ღ]

ورذاذ المطر يقطر على السيارة بشكل آسر
والمناطق هنا اغلبها فضاء واسع الأشجار وبعض الأعشاب اللي اتلفتها الحيوانات بأكلها تزين المكان خاصة انه تشعر من شافها في هالجو بأنها ترقص فرح بالمطر ومتأهبه لاستقباله !
طالعت في خلود الغرقانه بنومها قالت : خلود خلود اصحي شوفي المنظر
حركت خلود راسها وهي راسمه على وجهها علامات تدل على الانزعاج وتعكير النوم والمزاج
ففضلت شادن انها تتركها تكمل نومها
تكلمت سهام قالت : ترى القرى هذي اجواءها حلوة زي اجواء الطايف . اسأليني انا اللي لي سنه وهذي السنة الثانية هنا كل فترة وفترة تجي امطار وبكميات كبيرة لدرجة انا نضطر نغيب بالايام حتى مانغرق في السيول .
ردت شادن بفرح غيّر لها مودها اللي قبل شوي : الله يعني بنشوف امطار زي الخلق والناس مو زي امطار جده اللي مانشوفها الا في السنه حسنه على قولتهم !!!
ضحكت جواهر قالت : شكلك محبوسة في جده .
: الا اروح لمكه والطايف والمدينه بس مااطول وماقد صادفت امطار الا مرة وحده بالطايف .
: طيب ماقد رحتي للجنوب هناك الامطار شبه يومي .
ردت عليها وهي تتأمل المناطق اللي تقطعها السيارة بسرعه متوسطه : ادري بس ماصارت فرصه اروح هناك
تنفست سهام بعمق قالت : بنات تشمون ريحة المطر
: فتحت شادن الشباك اللي بجنبها واستنشقت ريح الخزامى والعشب الاخضر وهي مبلله بالرش الخفيف قالت بفرح ونفسية متجدده : نفسي اتمشى هنا
ردت سهام المولعه بالمناظر الطبيعيه وريحة المطر : ياليت ابو بدر يوقف هنا .
اما ابو بدر فما كان معاهم ذهنه مشغول في المطر لو زاد عن كذا .
والأفضل انه يرجع اليوم بدري ولا يجلس وينتظر الوضع يمكن المطر يبقى على حاله هذا مجرد رش خفيف لحد مايطلعون !
همه كان اكبر من التأمل والتمشيات والاستمتاع بالجو والمنظر !!
اخيرا وصلوا لقريه الأجواد

[ღღحفيدة ملوك ღ]

دقايق وكانت في المدرسه تطبق عبايتها بعد ماوقعت على حضورها ورجعت للغرفه مع البنات زميلاتها .
في الطابور !
المديرة هنا عكس ابلا سميحه متجهمه وشرسة من نظراتها
ممكن تكون متكبرة وممكن مغرورة وممكن مقهورة من شي وانعكس على تصرفاتها
عيونها تقول انها مقهورة وعندها مشكله وتعاني
قربت من شادن قالت : بكرة مناوبتك انتي ونوير .
هزت راسها شادن بحاضر وسكتت احتراماً لقوانين الاذاعه والانصات لها .
اخيراً خلص الطابور .
الطالبات دخلوا فصولهن والمدرسات اللي توجهت لفصلها وحصتها الاولى واللي راحت لغرفة المدرسات بانتظار وقت حصتها .
دخلت شادن غرفة المدرسات قالت نوير اللي تجمع دفاتر الطالبات من درج مكتبها : ها ياشادن عسى المدرسة اعجبتك .؟
ابتسمت شادن قالت لها بمحبة واخوة : والله يانوير لسه مااقدر احكم من اول يوم يعني تقريبا تشبه مدرسة السبيل بس المديرة فرق كبير الله يذكر ابلا سميحه بالخير
ضحكت نوير قالت : ذكرتيني بسارة صاحبتك ياليتها معانا كان يصير الجو غير .
: عاد سارة مافيه منها الله يسعدها
: آمين يالله حبيبتي عن اذنك انا بروح لفصلي اشوفك في الفسحه ان شاء الله .
: موفقه يارب .

[ღღحفيدة ملوك ღ]

طلعت نوير ودخلت خلود وعيونها منفخه من النوم ونفسها تكمل لولا ان عندها حصة اولى وقواعد تبغى لها تركيز ونشاط
قالت بسرعه : شادن الله يخليك صبي لي كوب نسكافيه باخذه معاي للفصل .
: حرام عليك بتاخذين معاك النسكافيه تشهين البنات فيهم .
: والله ؟ شايفه كذا ؟
: ايوه مساكين حرام تشهينهم بالريحه .
جلست خلود على الارض قالت : اجل صبي لي بشرب لو رشفتين عشان النوم يروح مني احسني لو اغمض نمت وانا واقفه .
صبت لها شادن نسكافيه من الترمس ومدته عليها قالت : خلود متى فاضية ؟
: مممممم الرابعه والسادسه بس
: الله يعينك
: احنا مدرسات العربي نهلك مو زي التاريخ والجغرافيا
: ماعليك مديرتكم ماخلتني على التاريخ والجغرافيا
: ليه ؟
: اعطتني فنية سنة اولى وثاني وثالث .
صرت خلود عيونها قالت : لئيمة . قبل فترة موزعتها بين البنات وماعليهن ضغط ولا شي .
: يالله الله يعين هذي البداية .
: ماعليك بكرة تتعودين عليها اوووه تأخرت على البنات والدرس اليوم طويل يالله اشوفك شدون .
قطعوا عليها دلال وجواهر وحدتها وقرروا يطلعون في الساحه المكشوفه واللي مايحجبها عن السما ستار او حاجز !
اخذوا معاهم القهوة والحلا اللي جابتها خلود وسهام خاصة ان الجو لايفوّت والبنات هنا متعودات على كسر بعض القوانين اذا فيها جو مثل هذا وتغيير للنفسية .!!

***
متحطمه ونفسيتها سيئة لابعد الحدود
الى الآن عاجزة تستوعب اللي قاله ابوها لها .
" خالد مايصلح لك ولا ينفعك وهي كلمة وحده ياسارة مكالمات مافيه وتفكير بخالد انسي ! "
اخذت الجوال اللي كانت مقفلته من يومين عصيبة مرت عليها وفتحته !
يومين ماسمعت صوته والشوق انهكها
بالرغم انها المفروض تزعل منه لحركته الا انها سامحته وماتقدر تزعل منه
واختلقت له العذر انه خلاص تأسف منها وماكان قاصد زعلها
ضمت على الجوال بيدها
بداخلها رغبة عارمة انها تتجاوز قوانين ابوها الصارمة بنظرها
وتسمع صوته !
ضغطت على رقمه بيد طفل خايف من عقاب امه وابوه !
دق مرة ومرتين وثلاث وأخيراً انفتح الخط
وصلها صوته تعبان بـ : الوو نعم ؟
هو صدق ولا تحلم ؟
طالعت بالشاشه
لا لا صدق الخط مفتوح وسمعته
تجاهلت لهجته الحاده والجلفه وسمحت لنفسها بالاستمتاع بصوته وبس
حطته على اذنها من جديد وجلست بارتياح عكس قبل ثواني .
همست بخوف وفرح : خاالد .
: ايه خالد وش بغيتي ؟
: ها ؟ اش فيك ؟ تعبان ؟ ليه صوتك كذا ؟
: يعني ماتدرين وش فيني ؟
قالت باحباط ودمعتها بعينها : اكيد ابوي قال لك لاتكلمها .
: ابوك قال لك شي عني .
: لا .